Ijtimoiy tarmoqlarda Samarqand shahridagi Bassiane tungi klubi oldida bir guruh fuqarolar o‘zaro janjallashgani aks etgan video tarqaldi. Viloyat IIB axborot xizmatining “Daryo”ga ma’lum qilishicha, tungi klub oldida janjal qilgan barcha shaxslarga nisbatan jinoyat ishi qo‘zg‘atilgan.
Ma’lum bo‘lishicha, 2022-yilning 7-avgust kuni fuqaro E.B. tanishi bilan Samarqand shahrida joylashgan Bassiane nomli tungi klubga dam olish maqsadida kirmoqchi bo‘lganda, klub qo‘riqchisi R.M. ularni klubga kiritmasligini aytib, nojo‘ya so‘zlar bilan haqorat qilgan. Shuningdek, bir guruh sheriklari bilan ularni urib, tan jarohati yetkazgan.
“Janjalda bir kishi vafot etganligi to‘g‘risidagi xabarlar haqiqatga to‘g‘ri kelmaydi”, — deyiladi viloyat IIB axborotida.
Mazkur holat yuzasidan fuqaro R.M. va boshqa shaxslarga nisbatan Samarqand shahri bo‘yicha IIO FMB huzuridagi Tergov bo‘limi tomonidan Jinoyat kodeksining 277-moddasi 2-qismi “b” bandi (bir guruh shaxslar tomonidan bezorilik) bilan jinoyat ishi qo‘zg‘atilib, tergov harakatlari olib borilmoqda.
Izoh (0)