Germaniya kansleri Olaf Shols Liz Trassni Buyuk Britaniya bosh vaziri etib tayinlangani bilan tabrikladi va uni Berlinga taklif qildi. Bu haqda Germaniya hukumati vakiliga tayanib, “RBK” xabar berdi.
“Ular dolzarb masalalar yuzasidan fikr almashdi. Kansler britaniyalik hamkasbiga tez orada inauguratsion tashrif bilan Berlinga kelishni taklif qildi”, — dedi Germaniya hukumati vakili.
Trass 5-sentabr kuni bo‘lib o‘tgan ovoz berishda Britaniya Konservativ partiyasi rahbari va yangi bosh vazir bo‘lgan edi. Unga Konservativ partiya a’zolarining 57,4 foizi ovoz bergan — uning raqibi, sobiq moliya kansleri Rishi Sunak esa 42,6 foiz ovoz olgan. Saylovlar Boris Jonson iste’foga chiqqanidan so‘ng qator janjallar hamda hukumat a’zolarining iste’folari fonida bo‘lib o‘tdi.
Bunga qadar Buyuk Britaniya tashqi ishlar vazirligi rahbari lavozimini egallab kelgan Trass Ukrainaga yordamni davom ettirishga, Rossiya va Xitoyga nisbatan siyosatni yumshatishga va energiya narxining keskin oshishi sharoitida britaniyaliklarni qo‘llab-quvvatlashga va’da berdi. Yangi lavozimdagi birinchi nutqida u elektr energiyasi narxining oshishiga qarshi kurash choralarini ko‘rishiga ishontirdi.
Trass lavozimga kirishganidan so‘ng qo‘ng‘iroqlashgan birinchi xorijiy yetakchi Ukraina prezidenti Vladimir Zelenskiy bo‘ldi. Zelenskiy uni lavozimga tayinlangani bilan tabriklab, Ukrainaga taklif qildi. Truss taklifni qabul qildi.
Kreml bosh vazir almashganidan keyin London bilan munosabatlar yaxshilanishini kutmayotganini ma’lum qilgan.
Izoh (0)