Turkiya prezidenti Rajab Toyyib Erdo‘g‘on va Serbiya prezidenti Aleksandr Vuchich Belgraddagi matbuot anjumanida G‘arbning Rossiyaga nisbatan siyosatini qoraladi, deb yozadi Meduza. Erdo‘g‘on G‘arbning xatti-harakatlarini “tomonlarni gijgijlash”, Ukrainaga yuborilayotgan qurol-yarog‘ni esa “lash-lushlar” deb atadi.
“G‘arbning pozitsiya xato deb ochiqdan-ochiq aytaman. Chunki G‘arbning tomonlarni provokatsiya qilishga asoslangan xatti-harakatlari yaqqol ko‘rinib turibdi. Harbiy ko‘mak haqida e’lon qilishyapti. Lekin fakt bo‘yicha, G‘arbda eskirib ketgan qancha qurol va metallolom bo‘lsa, hammasini Ukrainaga jo‘natishyapti, — dedi Erdo‘g‘on. Hozir siz tomonlardan biri g‘alaba qozonyapti deb ayta olasizmi? Yo‘q! Bu urushda g‘oliblar yo‘q, lekin mag‘lublar juda ko‘p. Katta sonli odamlar halok bo‘lyapti, moliyaviy tomoni haqida gapirish esa noo‘rin”.
Erdo‘g‘on, shuningdek, Yevropadagi energiya inqirozini tilga oldi: “Rossiya gaz yetkazib berishni to‘xtatdi, Yevropada narxlar esa ko‘tarilib ketdi. Hozir Yevropa mamlakatlarida qishki mavsumni yengib o‘tish yo‘llarini birgalikda qidirishyapti. Nima uchun bu haqda avvalroq o‘ylamadingiz? Axir Rossiyaning qo‘lida muhim resurs turibdi”.
Aleksandr Vuchich, o‘z navbatida, kelayotgan bir necha oy Yevroittifoq mamlakatlari uchun juda murakkab bo‘lishini aytdi.
“Shu qish barchamiz uchun juda sovuq bo‘ladi, kelasi yil esa butun Yevropani qutb qishi kutmoqda. Hech kim yechim qidirishni istamayapti, hamma murosani emas, dushmanning mag‘lubiyatini kutyapti. Agar haqiqatan ham Rossiyani harbiy yo‘l bilan osongina yengish mumkin deb o‘ylasangiz, unda ham sovuq, ham qutb qishiga yaxshilab tayyorlanishimiz kerak bo‘ladi”, — dedi Serbiya prezidenti.
Avvalroq Erdo‘g‘on Rossiyadan gaz yetkazib berishning qisqarishi tufayli kelayotgan qishda duch kelinadigan muammolarga Yevropa davlatlarining faqatgina o‘zlari aybdor bo‘lishini ta’kidlagandi.
Izoh (0)