Ukraina Rossiya siyosiy elitasining 606 nafar vakili — Xavfsizlik kengashin ing 28 a’zosi, Federatsiya kengashining 154 a’zosi va Davlat dumasining 424 nafar deputatiga nisbatan sanksiyalar kiritdi, deb yozadi “RBK” Ukraina prezidenti Vladimir Zelenskiyning bayonotiga tayanib.
Shuningdek, Ukraina Xavfsizlik xizmati sanksiyalarga uchragan bir nechta shaxslarning faoliyatiga nisbatan operatsiya olib borgan. Natijada bojxona ishchilari, shu jumladan, rahbarlari ham chetlatilgan.
“Chet el fuqaroligi, xususan, Rossiya va Ruminiy fuqaroligi borligi aniqlangan sanksiyalar ostidagi shaxslarga kelsak, Ukraina Xavfsizlik xizmati taklifi asosida va amaldagi qonunchilikka muvofiq, ushbu shaxslarning Ukraina fuqaroligini bekor qilish haqida qaror qabul qildim”, — dedi Zelenskiy.
5-avgust kuni Ukraina bosh vaziri Denis Shmigal hukumat Rossiyaga tegishli 903 ta obyektni Ukraina va ukrain xalqi foydasiga o‘tkazish haqidagi farmonni tasdiqlaganini aytgandi. Musodara etish rejalashtirilayotgan mol-mulkning barchasi uchta toifaga bo‘linadi, bular — Rossiya davlatiga tegishli mulk, Rossiyaning sanksiyalarga uchragan fuqarolari va kompaniyalariga tegishli aktivlar hamda Rossiya banklari aktivlari.
“Ukrainada Rossiya Federatsiyasi va uning rezidentlari mulk huquqi obyektlarini majburiy musodara qilishning asosiy tamoyillari to‘g‘risida”gi qonunni Zelenskiy 10-mart kuni imzolagan edi. Hujjatga muvofiq, mamlakatda bunday mol-mulkning musodara qilinishi “uning narxini qoplamagan holda” amalga oshiriladi. O‘shanda hujjat faqat yuridik shaxslar mulkiga taalluqli edi.
6-avgust kuni Zelenskiy Ukrainada qariyb 765 million dollarlik Rossiya aktivlari musodara etilganini ma’lum qildi. Undan avval Ukraina Iqtisodiy xavfsizlik byurosi direktori Vadim Melnik mamlakatda Rossiya va Belarusning 1 milliard dollarlik aktivlari xatlanganini aytgandi.
Izoh (0)