Ukraina Qurolli kuchlari bosh qo‘mondoni Valeriy Zalujniy va mudofaa qo‘mitasi raisining birinchi o‘rinbosari Mixail Zabrodskiy “Ukrinform” nashri uchun qo‘shma maqolasida Ukraina “Qrim aviabazalariga, shu jumladan, Saki harbiy aerodromiga ketma-ket muvaffaqiyatli raketa zarbalari” berganini ma’lum qildi. Ukraina harbiy rahbariyati birinchi marta Qrimdagi portlashlarga aloqadorligini tan olmoqda, deb yozadi “RBK”.
Maqola mualliflari “Ukraina Qurolli kuchlarining jangovar harakatlarni vaqtinchalik bosib olingan Qrim hududiga ko‘chirish bo‘yicha muvaffaqiyatli sa’y-harakatlari” haqida aytgan. “Gap dushman tomonning Qrimdagi aviabazalariga, birinchi navbatda — Saki aerodromiga ketma-ket muvaffaqiyatli raketa zarbalari haqida bormoqda”, — deyiladi matnda.
Saki aerodromidagi portlashlar 9-avgust kuni yuz berdi. Rossiya Mudofaa vazirligi ombor vazifasini o‘tagan maydonda bir qancha aviatsiya o‘q-dorilari portlab ketganini ma’lum qilgandi. Idora ma’lumotlariga ko‘ra, aerodromga “hech qanaqa olovli ta’sir” bo‘lmagan. Aviatsiya texnikasiga zarar yetmagan.
Qrim hukumati bir kishi halok bo‘lib, olti kishi jabrlanganini ma’lum qildi. OAVlarga ko‘ra, portlash sababi bo‘yicha asosiy versiya xavfsizlik qoidalarining buzilishi bo‘lgan.
Kiyev bugungi kunga qadar Saki aerodromida yuz bergan hodisa uchun javobgarlikni rasman o‘z zimmasiga olmagan edi, biroq The New York Times Ukraina Qurolli kuchlaridagi anonim manbasiga tayanib, portlash sodir bo‘lgan kuniyoq buning ortida Ukraina turgani haqida yozgandi. CNN esa o‘z qo‘liga kelib tushgan Ukraina hukumati hisobotiga tayanib, Kiyev yarim oroldagi Rossiya harbiy bazalari va qurol-yarog‘ omboriga hujumlar uchun javobgarligini tan olishi haqida xabar bergandi.
Ukraina Mudofaa vazirligi esa yozda Amerikaning HIMARS baravar o‘t ochish reaktiv tizimlaridan Qrimdagi Rossiya obyektlariga zarbalar berishda foydalanilishi mumkinligi haqida ogohlantirgandi.
Izoh (0)