O‘zbekistonda qarindosh bo‘lmaganlarni ularning roziligisiz “propiska”dan chiqarish mumkin bo‘ldi

O‘zbekistonda 2022-yil 1-sentabrdan boshlab qarindosh bo‘lmaganlarni ularning roziligisiz “propiska”dan chiqarishga ruxsat berildi.

Bu haqda “Mulk huquqining daxlsizligini ishonchli himoya qilish, mulkiy munosabatlarga asossiz aralashuvga yo‘l qo‘ymaslik, xususiy mulkning kapitallashuv darajasini oshirish chora-tadbirlari to‘g‘risida”gi prezident farmonida belgilangan.

Unga ko‘ra, 1-sentabrdan boshlab mulkdor bilan qarindoshlik aloqalariga ega bo‘lmagan shaxslarni (tanishlar, uzoq qarindoshlar) ushbu turar joydan doimiy ro‘yxatdan —  “propiska”dan chiqarish uchun ularning roziligini olish talab etilmaydi. Taraflar o‘rtasida boshqacha kelishuv tuzilgan holatlar bundan mustasno.

Ma’lumotlarga ko‘ra, oxirgi 2,5 yilda fuqarolik sudlariga shaxsni turar joydan ro‘yxatdan chiqarish bo‘yicha 8 954 ta da’vo arizalari kiritilgan, shundan 7 311 tasi (82 foizi) qanoatlantirilgan.