Yangi o‘quv yilining boshlanishi poytaxt Toshkentning talabalar bilan gavjumlashib, hayot sur’ati jadallashishiga olib keldi.
Talabalikning o‘zgacha zavqi, gashti bilan birgalikda tashvishi ham yo‘q emas. Ana shunday muammolarning dastlabkisi, turar joy masalasi. Bugun ko‘pchilik talabalar ayni shu muammo bilan yuzma-yuz kelgan.
“Daryo” muxbiri talabalarni qiynayotgan mazkur masalani o‘rganish maqsadida Toshkentdagi ayrim oliy ta’lim muassasalarida bo‘lib, talabalar o‘rtasida so‘rovnoma o‘tkazdi.
“Daryo” muxbiri bilan suhbatlashgan talabalardan biri tahsil olayotgan oliygohining yotoqxonasidan joy olish muammo bo‘layotganini, ijara uylari esa judayam qimmat ekanini aytmoqda.
“Yotoqxona so‘rasak, avvalo, birinchi kurslarga joy beramiz. Yana nogironligi bor, kam ta’minlangan, chin yetimlarga, joy ortsa, keyin sizga beramiz deyishyapti. Ijaraga uy olaylik desak, narxlar judayam qimmat. To‘rt kishi birlashib, bitta uyni olmoqchi bo‘lsak, birinchi oyning o‘zida har birimizga 1 million oshiqroq mablag‘ to‘g‘ri kelyapti. Qizlarga ham navbatga qarab turinglar deyishyapti. Qizlar qayerdan kvartira topadi? Ular ham qiz bola boshi bilan xonadonma-xonadon yurib, “Kvartira bormi?” deb so‘raydimi?”, — deydi Toshkent axborot texnologiyalari unversiteti talabasi.
Talaba nabirasi uchun ijara uy izlayotgan suhbatdosh onaxon esa uy izlab, 10 kundan beri Toshkent ko‘chalarida sarson bo‘layotgani bildirdi.
“Nabiramga kvartira izlab keldim. Shu yil institutga kirdi. Bir hafta, o‘n kundan beri Toshkent ko‘chalarida yotibman. Yotoqxonasi yana yigirma kundan keyin tayyor bo‘lar ekan. Uzoqdan kelgan bolalar yigirma kun ko‘chada yotmaydi-ku? Nega shuni o‘z vaqtida tayyorlab qo‘yishmaydi?
Ijara uylarni to‘rt yarim million deyapti. Bizga 300 dollarlik yaxshi uy bo‘lsa, nabiram besh-olti nafar do‘stlari bilan tursa bo‘ladi. Lekin o‘sha kvartiralarda ham sharoit yo‘q-da. Yigirmaga yaqinini o‘zim borib ko‘rdim. Borsangiz faqat gilami bor. Uylar yaxshi remont qilinmagan”, - deydi suhbatdosh.
Talablarni qiynayotgan mazkur masalaga birinchilardan bo‘lib e’tibor qaratgan mas’ul — O‘zJOKU rektori Sherzodxon Qudratxo‘ja Facebook'dagi sahifasida Toshkent shahri aholisiga murojaat qilib, uylarida bo‘sh joylari bo‘lsa talabalarga ijaraga berishlarini so‘radi.
Mazkur muammo yuzasidan 6-sentabr kuni Oliy ta’lim vaziri Abduqodir Toshqulov ham OTM rahbarlari ishtirokida yig‘ilish o‘tkazdi. Unda respublika bo‘yicha jami 26009 nafar talaba yotoqxonaga joylashtirilgani, bu jami yotoqxonaga ehtiyoji bor talabalarning 31 foizini tashkil etayotgani ma’lum qilindi. Shuningdek, 48 ming 309 nafar talaba ijara uylarga joylashgani, bu esa jami ijaraga ehtiyoji bor talabalarning 41 foizini tashkil etayotgani qo‘shimcha qilindi.
Xo‘sh, mazkur muammoning yechimi qanday? Muammo bilan yuzma-yuz kelgan talabalar va muammo yechimiga mas’ul bo‘lganlar qanday harakat qiladi? “Daryo” voqealar rivojini kuzatishda davom etadi.
Izoh (0)