Turkiyadagi inflyatsiya 1998-yil sentabr oyidan beri birinchi marta 80 foizdan oshdi. Bunga iqtisodiy o‘sish va arzon kreditlar ustuvorligini ta’minlagan siyosatlar lira va narx barqarorligiga to‘sqinlik qilmoqda. Bu haqda Bloomberg xabar berdi.
Turkiya statistika agentligi dushanba, 5-sentabr kuni e’lon qilgan ma’lumotlarga ko‘ra, yillik inflyatsiya avgust oyida ketma-ket 15-oy o‘sib, iyuldagi 79,6 foizdan 80,2 foizga ko‘tarildi.
Arzonroq qarz olish xarajatlari inflyatsiyani yuqoriga ko‘tarish o‘rniga sekinlashtirishi mumkinligiga ishongan Prezident Rajab Toyyib Erdo‘g‘an eksport va bandlikni kun tartibining birinchi o‘rinda tutdi.
Bu Turkiyada ro‘y berayotgan tirikchilik inqirozi saylovlarga bir yildan kamroq vaqt qolganida uning murojaatiga tahdid solayotgan bir paytda sodir bo‘ldi.
Turkiya inflyatsiyaga moslashtirilganda dunyodagi eng chuqur salbiy foiz stavkalariga ega. Markaziy bank esa o‘tgan oyda Turkiya asosiy stavkasini 14 foizdan 13 foizga tushirdi.
Turk lirasi bu yil dollarga nisbatan 27 foizga pasaydi, bu rivojlanayotgan bozorlardagi eng yomon ko‘rsatkichdir.
Bloomberg'ning ta’kidlashicha, Turkiyada inflyatsiya oktabr oyiga keling eng yuqori cho‘qqiga ko‘tariladi.
Turkiya rasmiylari shu paytgacha narxlarning o‘sishini o‘tkinchi deb atab kelgan va Rossiyaning Ukrainaga bostirib kirishini oziq-ovqat hamda xomashyo narxining global o‘sishiga sabab bo‘lganlikda ayblagan edi.
Erdog‘an o‘tgan hafta inflyatsiya yangi yil boshida pasayishni boshlashini aytib o‘tdi.
Hatto oziq-ovqat va energiya kabi o‘zgaruvchan mahsulotlarni chiqarib tashlaganda ham, Turkiya inflyatsiyasi o‘sib bormoqda — 66 foiz.
Turkiyaning eng boy shahri Istanbulda chakana inflyatsiya o‘tgan yilga nisbatan deyarli 100 foizga o‘sdi.
Avvalroq Turkiyada inflyatsiya 2025-yilda 9,9 foizgacha pasayishi kutilayotgani haqida xabar berilgan edi.
Izoh (0)