Vyetnam joriy yilning sakkiz oyida jahon bozoriga guruch eksportini 19 foizga oshirib, 4,7 million tonnagacha yetkazdi. Bu haqda “Tuoi Tre” mamlakat oziq-ovqat ishlab chiqaruvchilar uyushmasiga tayanib xabar berdi.
Tashkilot ma’lumotlariga ko‘ra, yil oxiriga qadar Vyetnam guruchini xorijga yetkazib berish hajmi 6,3—6,5 million tonnagacha oshishi kutilmoqda, bu esa ushbu mahsulotga tashqi bozorlarda talabning yuqoriligi bilan bog‘liq.
Mutaxassislarning prognozlariga ko'ra, Vyetnam guruchining eksport narxlari ham kelgusi oylarda ishlab chiqarish xarajatlarining oshishi va guruch yetishtiruvchi bir qator yirik mamlakatlarda noqulay ob-havo sharoitida bo‘lgan yomon hosil tufayli oshadi.
Mahalliy Qishloq xo‘jaligi vazirligi ma’lumotlariga ko‘ra, mamlakatda hozirda 7,3 million gektarda 26—28 million tonna sholi yetishtiriladi.
Bu miqdor mamlakatning oziq-ovqat xavfsizligini ta’minlash va 6—7 million tonna eksport qilish uchun yetarli.
Mavzuga doir: Global oziq-ovqat inqiroziga sabab: Hindiston guruch eksportini cheklamoqchi
Hindistonda kuzatilayotgan qurg‘oqchilik oqibatida guruch eksportining cheklanishi mumkinligi haqida xabar berilgan edi. Jahon bozoriga guruch yetkazib berishdagi eng yirik davlatning ushbu ehtimoliy qarori global ocharchilik xavfi yuzaga keltirdi. Vyetnam eksporti buni oldini olishi kutilmoqda.
Vetnam eksportining asosini agrosanoat majmuasi mahsulotlari tashkil etadi. Uning assortimentida guruch, qahva, choy, ziravorlar va dengiz mahsulotlari ustunlik qiladi.
Mamlakat uzoq vaqtdan beri qora murch eksporti bo‘yicha jahon yetakchiligini saqlab, kaju yong‘oqlari va undan tayyorlangan mahsulotlarning dunyodagi eng yirik eksportchisi bo‘lib qolmoqda.
Vyetnam, shuningdek, Hindiston va Tailanddan keyin dunyodagi uchinchi yirik guruch eksportchisi va xalqaro bozorga Braziliyadan keyin ikkinchi yirik kofe yetkazib beruvchi hisoblanadi.
Avvalroq o‘g‘it narxlarining balandligi sabab Osiyoda guruch hosili xavf ostidaligi haqida xabar berilgandi.
Izoh (0)