O‘zbekistondagi aksariyat kompaniyalar 2023-yilda o‘z xodimlarini ko‘paytirmoqchi

O‘zbekistondagi kompaniyalarning yarmidan ko‘pi, ya’ni 56 foizi 2023-yilda o‘z xodimlarini ko‘paytirish niyatida ekani ma’lum bo‘ldi. Bu haqda “Daryo”ga “hh.uz” xabar berdi.

Ish beruvchilarning 21 foizi hali bu masala bo‘yicha qaror qabul qilmagan, 23 foizi esa xodimlar sonini ko‘paytirishni rejalashtirmayapti.

So‘rovnoma qatnashchilari orasida chakana savdo (21 foiz), qurilish va ko‘chmas mulk (10 foiz), ta’lim (7 foiz), axborot texnologiyalari (7 foiz) va moliya (6 foiz) sohalaridagi kompaniyalar ustunlik qilgan.

Boshqa barcha tarmoqlar 4 dan 1 foizgacha ulushga ega. Ishtirokchilarning umumiy soni 126 ta kompaniya bo‘lgan.

Xodimlarni kengaytirishga tayyor bo‘lganlarning eng yuqori ulushi — chakana savdo, tibbiyot va farmatsevtika, qurilish va ko‘chmas mulk kompaniyalari orasida.

Kengayish bo‘yicha yetakchi bo‘lim savdo bo‘limi (36 foiz) bo‘ldi. Ikkinchi o‘rinda ishlab chiqarish (16 foiz), marketing bo‘limi esa uchinchi (9 foiz) o‘rinda.

Keyingi o‘rinlarda esa mos ravishda axborot texnologiyalari bo‘limi (7 foiz) va boshqaruv bo‘limi (3 foiz) egallagan.

Avvalroq ko‘p uxlaydigan xodimlar kam uxlaydiganlariga qaraganda samaraliroq ishlashi aniqlangani haqida xabar berilgandi.