Xitoyning elektronika ishlab chiqaruvchi Huawei kompaniyasi o‘z xodimlarining bir qismini Rossiyadan O‘zbekiston va Qozog‘istonga o‘tkazdi. Bu haqda “Vedemosti” nashriga tayanib Forbes xabar bermoqda. Huawei matbuot xizmati xodimlarining Rossiyadan ko‘chirilishi haqidagi ma’lumotga izoh bermagan.
Xitoy kompaniyasi rossiyalik xodimlarini O‘zbekiston va Qozog‘istonda ishlashi uchun 2022-yil bahoridan qayta taqsimlashni boshlagan.
Ma’lum bo‘lishicha, xodimlarning bir qismi Xitoydan kelgan Huawei bo‘linmalarining menejerlari va rahbarlaridir.
Ular yil boshida Rossiyaga jo‘natilgan, biroq keyinchalik MDHning boshqa mamlakatlariga yo‘naltirilgan.
Ba’zi rossiyalik menejerlar ham uzoq xizmat safarlariga yuboriladi. Telecom Daily tahliliy agentligi bosh direktori Denis Kuskovning so‘zlariga ko‘ra, ular asosan Qozog‘istonga ko‘chib o‘tishi kutilmoqda.
Kompaniya xodimlarini iyul—avgust oylarida ko‘chirishni boshladi, Qozog‘iston esa barcha MDH mamlakatlari orasidan tanlandi. Bu bozor Huawei uchun mintaqadagi eng yirik va istiqbollidir, — dedi Kuskov.Uning so‘zlariga ko‘ra, Qozog‘istonga o‘tkazilgan xodimlar kompaniya biznesining nafaqat ushbu davlat, balki MDHning barcha mamlakatlarida rivojlanishi uchun javobgar bo‘ladi.
Bahorda bir qator yirik sotuvchilar, smartfonlar va boshqa telekommunikatsiya uskunalari ishlab chiqaruvchilari Rossiyadagi faoliyatini to‘xtatilishini yoki Rossiya bozoridan chiqishini e’lon qildi.
Huawei Rossiyada faoliyatini davom ettirish yoki ketish haqida rasmiy bayonot bermadi. Avgust oyi boshida Xitoy kompaniyasi o‘zining Vmall bozorida sotuvlar to‘xtatilganini e’lon qildi, biroq mijozlarga berilgan buyurtmalarni yetkazib berishga va allaqachon qilingan xaridlar bo‘yicha kafolat xizmatini saqlab qolishga va’da berdi.
Global miqyosda Huawei’ning 2022-yilning birinchi yarmidagi sof foydasi 52 foizga kamayib, 15,1 milliard yuanni (2,2 milliard dollar) tashkil qildi.
Izoh (0)