Norvegiya valiahd malikasi Mette-Maritning 28 yoshli o‘g‘li Marius Borg Hoybi 32 ta jinoyat ishi bo‘yicha ayblanmoqda. Bu haqda Reuters xabar berdi.
Unga nisbatan ayblov oilaviy zo‘ravonlik, to‘rtta zo‘rlash holatini ham o‘z ichiga oladi. Ulardan ayrimlarini Hoybining o‘zi shaxsan videoga ham olgan. Erkakning advokatiga ko‘ra, valiahd malikaning o‘g‘li eng jiddiy ayblovlarni rad etmoqda. Biroq ayrim yengilroq moddalar bo‘yicha aybini tan olishga tayyor.
Sud jarayoni 2026‑yil yanvar oyida boshlanishi kutilmoqda. Hoybi eng jiddiy ayblovlarda aybdor deb topilsa, 10 yilgacha ozodlikdan mahrum qilinishi mumkin.
Marius Borg Hoybi onasi Mette-Maritning avvalgi munosabatlaridan tug‘ilgan o‘g‘lidir. Ayol 2001-yilda Norvegiya taxti vorisiga turmushga chiqqan. Bu nikohdan u yana ikki farzand ko‘rgan. Hoybiga qarshi tergov 2024-yilda boshlangan. O‘shanda uni qisqa muddatga qamoqqa olishgandi. Hoybi qirollik unvoniga va taxtni meros qilib olish huquqiga ega emas.
Izoh (0)