Қозоғистонда дон нархи кескин тушди. Шу пайтгача 3-навдаги буғдойнинг бир тоннаси учун 150 минг тенге таклиф қилинган бўлса, ҳозирда бу нарх 115–116 минг тенгени ташкил этмоқда.
Қайд этилишича, нарх ўзгаришига мамлакатда йиғим-терим мавсумининг бошланиши ва Россиядан арзонроқ ғалланинг келиши ўз таъсирини кўрсатган.
«Лекин, менимча, нарх бундан буён тушмайди, аксинча, ошади. Нега? Биринчидан, Қозоғистон 10 сентябрдан бошлаб дон ва ун экспортига чекловларни олиб ташлайди. Иккинчидан, эшитишимизча, 15 сентябрдан бошлаб Қозоғистон Россиядан автомобиль йўллари орқали ғалла олиб киришни тақиқламоқчи экан. Бу тўғрими ёки нотўғри, билмайман, лекин шундай ечим муҳокама қилинаётганини эшитдим», — дейди 2 минг гектар майдонда деҳқончилик қилаётган Леонид Кромиади.
Фермерлар донни автомобиль йўллари орқали олиб киришни тақиқлашни қўллаб-қувватламоқда. Юқори ҳосилдорлик туфайли россиялик фермерлар буғдойни арзонроқ нархда таклиф қилишлари мумкин. Қозоғистонга контрабанда сифатида кирса, ундан ҳам арзонроқ бўлади. Айнан шу омил Қозоғистоннинг ички бозорида нархлар пасайишига олиб келади.
«Успенское назорат-ўтказиш пункти биздан унчалик узоқ эмас ва биз ҳар куни Россиядан Қозоғистонга ғалла ортилган 300–400 та юк машинаси кириб келаётганини кўряпмиз. Тасаввур қилинг, бизга арзонроқ бўлган қанча дон келади. Улар билан рақобатлаша олмаймиз. Биз нархларимизни туширишга мажбур бўламиз», — дейди Кромиади.
Шунга қарамай, Леонид Кромиади янги йилга келиб буғдой нархи 140 минг тенге бўлишини тахмин қилмоқда. Унинг фикрича, агар Қозоғистондан экспорт очилса, Россиядан автомобиль йўллари орқали ғалла импорти ёпилса, нархлар шу даражага етади.
Изоҳ (0)