Xitoyning Tyanszin universiteti olimlari yangi avlod litiy-metal batareyasini ishlab chiqdi. Uning kuchi Tesla ishlab chiqaradigan batareyalardan ikki barobar ortiqligi aytilmoqda. Bu haqda The Independent xabar berdi.
Ma’lum qilinishicha, qurilmaning energiya zichligi bir kilogram uchun 600 vatt-soatdan ortiq bo‘lib, u Tesla elektromobillarida qo‘llanilayotgan eng ilg‘or batareyalardan ikki baravar samaraliroq. Oddiy litiy-ion batareyalariga qaraganda litiy-metal batareyalar nazariy jihatdan ancha kuchli hisoblanadi. Tesla ishlab chiqarayotgan batareyalar 300 vatt-soat/kg quvvatga ega bo‘lsa, BYD’ning “Blade” batareyalari atigi 150 vatt-soat/kg imkoniyatga ega.
Tyanszin olimlari esa “delokalizatsiyalangan elektrolit” texnologiyasi yordamida 604,2 vatt-soat/kg natijaga erishdi. Bu esa Xitoyning “Made in China 2025” dasturida belgilangan 400 vatt-soat/kg mezondan ancha yuqori. Tadqiqotchilarning izoh berishicha, yangi turdagi elektrolit ionlarning tezroq va barqaror harakatlanishiga imkon beradi, bu esa batareya ishlash muddatini uzaytiradi va xavfsizlikni oshiradi. Sinov natijalariga ko‘ra, yangi batareya 100 martalik siklda ham barqaror ishlashni davom ettirgan.
Olimlar texnologiyani allaqachon dronlar uchun yuqori quvvatli batareyalar ishlab chiqarishda sinab ko‘rgan. Mutaxassislar bu yechim kelajakda elektromobillar, smartfonlar va boshqa ko‘plab qurilmalarda inqilobiy o‘zgarishlarga sabab bo‘lishi mumkinligini aytmoqda.
Izoh (0)