Namangan viloyatining Chortoq tumanidagi Sulton Uvays Qaroniy ziyoratgohidan noyob Qur’oni karim qo‘lyozmasini o‘g‘irlagan shaxslar kitobni xorijga sotishni rejalashtirgan. Bu haqda tuman IIB tergov bo‘linmasi boshlig‘i Ulug‘bek Yoqubov ma’lum qildi, deya xabar beradi “Daryo” muxbiri Azizbek Abduvaliyev.
Yoqubovning qayd etishicha, ayblanuvchilar jinoyatga puxta tayyorgarlik ko‘rgan. Egnilarida kapyushonli kiyim, yuzlarida niqob, qo‘llarida maxsus qo‘lqop va kitobni turgan joyidan olish uchun zarur asbob-anjomlar bo‘lgan. O‘g‘rilikni amalga oshirgandan so‘ng noma’lum yo‘nalishda yashirinishgan.
“Yuz bergan holat haqida xabar olinganidan so‘ng zudlik bilan tezkor guruh tuzildi va qidiruv-surishtiruv ishlariga kirishildi. Ziyoratgoh xodimlari, yon-atrofda yashovchi fuqarolar so‘roq-savol qilindi. Muqaddam sudlangan va jinoyatga moyilligi bo‘lgan shaxslarga alohida e’tibor qaratildi”, — deydi tergovchi.
Olib borilgan tezkor surishtiruv ishlari natijasida gumonlanuvchilardan biri, 1983-yilda Chortoq tumanida tug‘ilgan, muqaddam qotillik va firibgarlik jinoyatlarini sodir etganligi uchun ikki marta sudlangan shaxs qo‘lga olindi. U avvaliga aybini tan olmagan bo‘lsa-da, psixologik ta’sir va keltirilgan fakt-dalillar ortidan qilmishiga iqror bo‘ldi. Jinoiy sherigi va kitob qayerda saqlanayotgani ma’lum qildi.
Shundan so‘ng uning Namangan shahrida yashovchi, 1990-yilda tug‘ilgan sherigi qo‘lga olindi. Kreditlar va oldi-berdilar hisobiga 20 ming dollar atrofida qarzi bo‘lgan ushbu shaxs chortoqlik tanishining kitobni o‘g‘irlab, sotib, shundan so‘ng qarzlarni to‘lash haqidagi taklifiga rozilik bergan. Kitob esa o‘g‘irlanganidan so‘ng uning Namangan shahri, Navoiy ko‘chasida istiqomat qiluvchi singlisining uyida go‘yoki birovning omonati sifatida saqlangan.
“Ayblanuvchilar kitobni xorijda sotishni rejalashtirgan, chunki buni O‘zbekistonda imkoni yo‘qligini juda yaxshi anglagan. Kitob qadimiy va qimmatbaho ekanligini ham bilishgan. Biroq ularning bu jinoiy rejasi amalga oshmadi. Kitob bus-butun, ziyon yetmagan holatda topildi va avvalgi joyiga qaytarildi. Hozirda qo‘lyozma saqlanadigan hudud Milliy gvardiya xodimlari tomonidan kuchaytirilgan tarzda qo‘riqlanmoqda”, — deydi Ulug‘bek Yoqubov.
Hozirda mazkur jinoiy ish yuzasidan dastlabki tergov harakatlari davom ettirilmoqda.
Mavzuga doir:
- “Daryo” surishtiruvi: Noma’lum shaxslar tomonidan o‘g‘irlab ketilgan va O‘zbekistonda Usmon Mus’hafidan keyin ikkinchi o‘rinda turadigan Qur’oni Karim qo‘lyozmasi Namanganga qanday kelib qolgandi?
- Namanganda Qur’oni Karimning noyob qo‘lyozmasini o‘g‘irlab ketgan shaxslar qo‘lga olindi (video)
- Namanganda 10 kun avval o‘g‘irlab ketilgan Qur’oni Karim qo‘lyozmasi yana o‘z joyiga qaytarildi
Izoh (0)