Yaponiya “Meva-sabzavotchilik tarmog‘ida qo‘shilgan qiymat zanjiri yaratishni rivojlantirish” kredit liniyasi doirasida O‘zbekistonga qo‘shimcha 200 million dollar ajratadi. Bu haqda investitsiyalar va tashqi savdo vazirligi matbuot xizmati xabar berdi.
Ma’lum qilinishicha, 29-avgust kuni investitsiyalar va tashqi savdo vaziri Jamshid Xo‘jayev Yaponiya xalqaro hamkorlik agentligi (JICA)ning katta vitse-prezidenti Keyitiro Nakazava boshchiligidagi delegatsiyasini qabul qildi.
Uchrashuvda “Meva-sabzavotchilik tarmog‘ida qo‘shilgan qiymat zanjiri yaratishni rivojlantirish” kredit liniyasi ikkinchi bosqichi doirasida qo‘shimcha 200 million dollar ajratish bo‘yicha ayirboshlash notalarini va qarz bitimini imzolash marosimi bo‘lib o‘tgan. Muzokaralar davomida tomonlar kredit liniyasining birinchi bosqichi doirasida O‘zbekistonda 300 dan ortiq loyihalar hayotga tatbiq etilgani va 5 mingdan ortiq yangi ish o‘rinlari yaratilganligini ta’kidlagan.
Qayd etilishicha, ushbu loyiha fermer xo‘jaliklari va tegishli tashkilotlar, kichik biznes va xususiy tadbirkorlik vakillarining moliyaviy barqarorligini oshirish maqsadida mahalliy tijorat banklariga kredit liniyasini ajratishni nazarda tutadi. Bu esa, o‘z navbatida, O'zbekistonda raqobatbardosh meva-sabzavot mahsulotlari ishlab chiqarish hajmini oshirishga imkon beradi.
Izoh (0)