Toshkent viloyatida Range Rover boshqa avtomobillarga xalaqit qilib harakatlangani haqida xabar berilgandi. Yo‘l harakati xavfsizligi xizmatining ma’lum qilishicha, qoidabuzar haydovchiga chora ko‘rildi.
Ijtimoiy tarmoqda Range Rover rusumli, 01 517 LJA davlat raqam belgili avtomobil haydovchisi avariya holatini yuzaga keltirishi mumkin bo‘lgan turli xavfli manyovrlar bilan harakatlangani aks etgan video tarqaldi. Mazkur video xodimlar tomonidan o‘rganilib, haydovchi — 1979-yilda tug‘ilgan Nishonov Dilmurod Zokirovichga nisbatan Ma’muriy javobgarlik to‘g‘risidagi kodeksning 128⁵-moddasi (transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqishi) 2-qismi bilan chora ko‘rildi.
Har qanday qoidabuzarlik va huquqbuzarlik uchun qonunda belgilangan tartibda chora ko‘riladi. Ayrim ijtimoiy tarmoq obunachilaridan asoslanmagan, aniqlik kiritilmagan ma’lumotlarni turli noo‘rin izohlar bilan omma e’tiboriga tarqatmaslikni so‘raymiz. Holatda aks etgan barcha ishtirokchilarning xatti-harakatiga huquqiy baho beriladi, mazkur yo‘nalishda surishtiruv ishlari olib borilmoqda.
Shuningdek, ushbu videolavhani tasvirga olgan transport vositasi haydovchisi hamda Nexia-3 rusumli avtomobilni boshqargan haydovchilarning shaxsini aniqlashga qaratilgan tadbirlar olib borilmoqda, ularning harakatlariga ham huquqiy baho beriladi. Barcha haydovchilardan qoidalarga rioya qilishlarini so‘raymiz, — deyiladi xabarda.
Izoh (0)