Наманган вилоятининг Чортоқ туманидаги Султон Увайс Қароний зиёратгоҳидан ноёб Қуръони карим қўлёзмасини ўғирлаган шахслар китобни хорижга сотишни режалаштирган. Бу ҳақда туман ИИБ тергов бўлинмаси бошлиғи Улуғбек Ёқубов маълум қилди, дея хабар беради «Дарё» мухбири Азизбек Абдувалиев.
Ёқубовнинг қайд этишича, айбланувчилар жиноятга пухта тайёргарлик кўрган. Эгниларида капюшонли кийим, юзларида ниқоб, қўлларида махсус қўлқоп ва китобни турган жойидан олиш учун зарур асбоб-анжомлар бўлган. Ўғриликни амалга оширгандан сўнг номаълум йўналишда яширинишган.
«Юз берган ҳолат ҳақида хабар олинганидан сўнг зудлик билан тезкор гуруҳ тузилди ва қидирув-суриштирув ишларига киришилди. Зиёратгоҳ ходимлари, ён-атрофда яшовчи фуқаролар сўроқ-савол қилинди. Муқаддам судланган ва жиноятга мойиллиги бўлган шахсларга алоҳида эътибор қаратилди», — дейди терговчи.
Олиб борилган тезкор суриштирув ишлари натижасида гумонланувчилардан бири, 1983 йилда Чортоқ туманида туғилган, муқаддам қотиллик ва фирибгарлик жиноятларини содир этганлиги учун икки марта судланган шахс қўлга олинди. У аввалига айбини тан олмаган бўлса-да, психологик таъсир ва келтирилган факт-далиллар ортидан қилмишига иқрор бўлди. Жиноий шериги ва китоб қаерда сақланаётгани маълум қилди.
Шундан сўнг унинг Наманган шаҳрида яшовчи, 1990 йилда туғилган шериги қўлга олинди. Кредитлар ва олди-бердилар ҳисобига 20 минг доллар атрофида қарзи бўлган ушбу шахс чортоқлик танишининг китобни ўғирлаб, сотиб, шундан сўнг қарзларни тўлаш ҳақидаги таклифига розилик берган. Китоб эса ўғирланганидан сўнг унинг Наманган шаҳри, Навоий кўчасида истиқомат қилувчи синглисининг уйида гўёки бировнинг омонати сифатида сақланган.
«Айбланувчилар китобни хорижда сотишни режалаштирган, чунки буни Ўзбекистонда имкони йўқлигини жуда яхши англаган. Китоб қадимий ва қимматбаҳо эканлигини ҳам билишган. Бироқ уларнинг бу жиноий режаси амалга ошмади. Китоб бус-бутун, зиён етмаган ҳолатда топилди ва аввалги жойига қайтарилди. Ҳозирда қўлёзма сақланадиган ҳудуд Миллий гвардия ходимлари томонидан кучайтирилган тарзда қўриқланмоқда», — дейди Улуғбек Ёқубов.
Ҳозирда мазкур жиноий иш юзасидан дастлабки тергов ҳаракатлари давом эттирилмоқда.
Мавзуга доир:
- «Дарё» суриштируви: Номаълум шахслар томонидан ўғирлаб кетилган ва Ўзбекистонда Усмон Мусҳафидан кейин иккинчи ўринда турадиган Қуръони Карим қўлёзмаси Наманганга қандай келиб қолганди?
- Наманганда Қуръони Каримнинг ноёб қўлёзмасини ўғирлаб кетган шахслар қўлга олинди (видео)
- Наманганда 10 кун аввал ўғирлаб кетилган Қуръони Карим қўлёзмаси яна ўз жойига қайтарилди
Изоҳ (0)