Qoraqalpog‘iston voqealari bo‘yicha qo‘lga olinganlarning 24 nafari jamoat kafilligi asosida o‘z oilasiga qaytarilgani haqida xabar berilgandi. Qoraqalpog‘istonda bo‘lib o‘tgan voqealarni mustaqil ravishda o‘rganayotgan komissiya a’zolari taklifi bilan yana 10 nafar shaxsning qamoq ehtiyot chorasi uy qamog‘iga almashtirildi.
Ta’kidlanishicha, komissiya a’zolari taklifi va Qoraqalpog‘iston Jo‘qorg‘i Kengesi iltimosnomasiga ko‘ra, Bosh prokuratura tomonidan 24 nafar gumonlanuvchining jamoat kafilligi asosida o‘z oilasiga qaytarilgandi. Shu kunning o‘zida yana 10 nafar fuqaroning qamoq ehtiyot chorasi insonparvarlik tamoyili asosida uy qamog‘i tarzidagi ehtiyot chorasiga almashtirildi.
30-avgust kunining o‘zida jami 34 nafar fuqaro insonparvarlik tamoyili asosida oilasiga qaytarildi.
Ma’lumot uchun, Bosh prokuraturaga kiritilgan ro‘yxat, namoyishlarda ishtirok etganlikda gumon qilinib olib ketilgan shaxslarning oila a’zolari tomonidan komissiyaga qilingan murojaatlarining o‘rganilishi va gumonlanuvchilar bilan shaxsan suhbatlashish asosida shakllantirilgan.
Komissiya tomonidan sodir etgan qilmishlaridan pushaymon bo‘lgan, qaramog‘ida voyaga yetmagan farzandlari bor, shuningdek, oilaviy sharoiti va ijtimoiy holati og‘ir hamda oilada yolg‘iz boquvchi bo‘lgan fuqarolar ro‘yxati shakllantirilgan.
Yakkama-yakka shaklda o‘tkazilgan suhbat davomida ular vaziyatni yaxshi anglamagan holda yolg‘on axborotlar ta’siriga tushib qolganini va sodir etgan qilmishiga chin ko‘ngildan pushaymon ekanini bildirgan. Ayniqsa, ayollar farzandlarini juda sog‘ingani va bo‘lib o‘tgan voqealardan to‘g‘ri xulosa chiqarganini ma’lum qilgan.
Izoh (0)