Dunyoning eng badavlat milliarderlari Fed rahbari Jerom Pauellning nutqidan keyin 30 mlrd dollardan ko‘proq mablag‘ yo‘qotdi. Bu haqda Forbes xabar bermoqda.
Nutq sakkiz daqiqa davom etib, unda Pauell kelajakda foiz stavkalari o‘sishda davom etishini taklif qilgan.
Forbes ma’lumotlariga ko‘ra, dunyodagi eng badavlat tadbirkor, Tesla rahbari Ilon Maskning boyligi 5,4 mlrd dollarga kamaydi. Hozir uning kapitali 257,3 mlrd dollarga baholanmoqda.
LVMH kompaniyasining asosiy egasi Bernard Arno 4,5 mlrd dollar yo‘qotdi, uning boyligi 161,7 mlrd dollarni tashkil etmoqda. Amazon asoschisi Jeff Bezosning boyligi 6,5 mlrd dollarga kamayib, 155,3 mlrd dollarga yetdi.
Google asoschilari Sergey Brin va Larri Peyj taxminan 5 mlrd dollar, sarmoyadorlar Uorren Baffet va Larri Ellison har biri 3 mlrd dollardan, Bill Geyts esa 2 mlrd dollardan ko‘proq zarar ko‘rdi.
Hindistonlik milliarder va Adani Group konglomerati egasi Gautam Adani dunyodagi eng boy o‘nta odam ro‘yxatida pulini yo‘qotmagan yagona odamga aylandi. Uning boyligi 1,6 mlrd dollarga oshib, 140,1 mlrd dollarga yetdi.
Bloomberg hisob-kitoblariga ko‘ra, eng boy amerikaliklar Jerom Pauellning nutqidan keyin jami 78 mlrd dollargacha yo‘qotgan.
Pauellning bayonoti fonida AQSH fond bozori cho‘kdi. S&P 500 3,4 foizga tushib ketdi, bu iyun oyining o‘rtalaridan beri eng yomon ko‘rsatkichdir.
Microsoft, Amazon, Tesla va Alphabet aksiyalarini o‘z ichiga olgan Nasdaq 100 indeksi 4 foizdan ko‘proq pasayishni ko‘rsatdi.
Avvalroq dunyoning eng yirik fondi rekord darajada — 174 mlrd dollar yo‘qotgani haqida xabar berilgandi.
Izoh (0)