O‘zbekiston banklarida muammoli kreditlar ko‘paya boshladi

Markaziy bank 2022-yil 1-avgust holatiga ko‘ra banklarning muammoli kreditlari to‘g‘risida ma’lumot berdi.

Unga ko‘ra, banklardagi jami kredit portfeli 346,4 trln so‘mgacha yetgan. Bu o‘tgan oyga nisbatan 2,8 trln so‘mga ko‘proqdir. Iyun oyida muammoli kreditlar 1,8 trln so‘mga kamaygan edi.

Banklardagi umumiy muammoli kreditlar (NPL) miqdori qariyb 250 mlrd so‘mga ko‘payib, 16,9 trln so‘mga yetgan. Umumiy kredit portfelidagi NPL ulushi 4,9 foizda saqlanib qolgan. 

Banklar orasida NPL miqdori eng ko‘p “Xalq bank”ida saqlanib qolmoqda va o‘tgan oyga nisbatan deyarli o‘zgarmagan — 3,5 trln so‘m. 

Muammoli kreditlarning ulushi bo‘yicha eng baland ko‘rsatkich “Turkiston bank”da — bankning jami kreditlardagi NPL ulushi 94,5 foizni tashkil qildi.

Avvalroq Markaziy bank kreditlar to‘g‘risida fuqarolardan kelib tushgan murojaatlarga munosabat bildirgan edi.