O‘zbekistonliklar Buyuk Britaniyaga vaqtinchalik ishlashga viza olish bo‘yicha yetakchilardan bo‘lmoqda

Yevropa Ittifoqiga kiruvchi muhojirlar soni keskin kamayib borayotgani sababli Buyuk Britaniyaga ishlash uchun ko‘chib o‘tayotgan yevropalik bo‘lmaganlar soni ortib bormoqda. Bu haqda Financial Times xabar berdi.

Nashrning ma’lum qilishicha, Buyuk Britaniyada vaqtinchalik ish vizalari 29 mingtaga ko‘payib, 72,5 mingtaga yetgan. Bu turdagi vizalarni eng ko‘p olish bo‘yicha Ukraina yetakchilik qilmoqda — 14,1 mingta.

Bundan tashqari, Rossiya va Ukraina o‘rtasida urush boshlangandan beri O‘zbekiston va boshqa Markaziy Osiyo davlatlarining fuqarolari vaqtinchalik ishlash uchun ko‘proq viza olmoqda.

Buyuk Britaniyada joriy yilda iyun oyigacha bo‘lgan davrda rekord darajadagi 1,1 mln vizalar berilgan. Bular orasida ishchilar, talabalar va ularning oila a’zolari ham bor. 

Avvalroq Buyuk Britaniyada ishchilar yetishmasligi sabab oziq-ovqatlar isrof bo‘layotgani, buni bartaraf etish uchun O‘zbekistondan ham odamlar jalb qilingani haqida xabar berilgan edi. 

Britaniyada yilning birinchi yarmida 71,2 million yevrodan ortiq oziq-ovqat ishchi kuchi yetishmasligi sababli isrof bo‘lgan.