Toshkentda Milliy ro‘yxatga kiritilgan obyektda Madaniy meros agentligining tegishli ruxsatisiz ta’mirlash ishlari olib borildi

Toshkent shahar Mirobod tumani Taras Shevchenko ko‘chasi 11-uyda joylashgan Geologiya muzeyi binosi Moddiy madaniy merosning ko‘chmas mulk obyektlari Milliy ro‘yxatiga kiritilgan bo‘lib, unda faqatgina Madaniy meros agentligining tegishli ruxsati asosida ta’mirlash va tiklash ishlarini olib borish mumkinligi qonunchilikda ko‘rsatib o‘tilgan.

Biroq ushbu binoda Toshkent shahar madaniy meros boshqarmasining ruxsatisiz ta‘mirlash ishlari olib borilgani aniqlandi. Muzey rahbariyatiga madaniy meros obyektida olib borilayotgan qurilish va ta’mirlash ishlarini to‘xtatish to‘g‘risida 2022-yilning 20-avgust sanasida ko‘rsatma xati berildi.

E’tiborli tomoni, avvalroq ham ushbu obyektning fasad qismida ta’mirlash ishlari ruxsatsiz amalga oshirilgani to‘g‘risida ko‘rsatma xati berilgan edi. Ammo muzey rahbariyati ushbu xatdan tegishli xulosa chiqarmay, ta’mirlash ishlarini olib borgan.

Ayni vaqtda tegishli idoralar tomonidan madaniy meros obyektiga yetkazilgan zarar miqdori aniqlanmoqda. Ushbu holat yuzasidan tegishli hujjatlar Toshkent shahar prokuraturasiga taqdim etilgan.