Toshkent metrosining “Tinchlik” bekati kirish yo‘lagida ham suv toshdi. Bu haqda Veolia Energy Tashkent matbuot xizmati xabar berdi.
Ma’lum qilinishicha, 2022—2023-yillarda isitish mavsumiga sifatli tayyorgarlik ko‘rish maqsadida joriy yil 23-avgust kuni 1-IM qozonxonasining amal qilish hududida issiqlik quvurlarining mexanik chidamliligi va zichligi (yuqori bosimda) sinovdan o‘tkazildi.
Oldindan kelishilgan jadval asosida o‘tkazilgan sinov jarayonida 3-IMga ulangan “Tinchlik” metro bekati yaqinidagi issiqlik tarmog‘ida avariya sodir bo‘ldi. Oqibatda metroga tushish yo‘lagida devordan issiq suv toshib chiqishi kuzatildi.
Veolia Energy Tashkent MCHJ XK Olmazor tuman boshqarmasi xodimlari tomonidan maxsus texnikalar yordamida avariya holati yuzaga kelgan metroning kirish yo‘lagida suv toshishi to‘xtatildi.
Xabarda aytilishicha, hozirda avariyani zudlik bilan bartaraf etish choralari ko‘rilmoqda.
Eslatib o‘tamiz, 23-avgust kuni “Buyuk ipak yo‘li” metro bekatining yuqori qismidan o‘tgan issiqlik quvurlariga sinov tariqasida suv yuborilishi oqibatida diametri 400 lik bo‘lgan quvur ishdan chiqib, bekatga suv sizib o‘tgandi.
Ma’lumot uchun, Vazirlar Mahkamasining tegishli qaroriga muvofiq, Veolia Energy Tashkent kompaniyasi 1-iyuldan boshlab ilgari “Toshissiqquvvati” boshqaruvida bo‘lgan barcha faoliyat turlarini amalga oshirib kelmoqda.
Izoh (0)