Тошкент шаҳар Миробод тумани Тарас Шевченко кўчаси 11-уйда жойлашган Геология музейи биноси Моддий маданий мероснинг кўчмас мулк объектлари Миллий рўйхатига киритилган бўлиб, унда фақатгина Маданий мерос агентлигининг тегишли рухсати асосида таъмирлаш ва тиклаш ишларини олиб бориш мумкинлиги қонунчиликда кўрсатиб ўтилган.
Бироқ ушбу бинода Тошкент шаҳар маданий мерос бошқармасининг рухсатисиз таъмирлаш ишлари олиб борилгани аниқланди. Музей раҳбариятига маданий мерос объектида олиб борилаётган қурилиш ва таъмирлаш ишларини тўхтатиш тўғрисида 2022 йилнинг 20 август санасида кўрсатма хати берилди.
Эътиборли томони, аввалроқ ҳам ушбу объектнинг фасад қисмида таъмирлаш ишлари рухсатсиз амалга оширилгани тўғрисида кўрсатма хати берилган эди. Аммо музей раҳбарияти ушбу хатдан тегишли хулоса чиқармай, таъмирлаш ишларини олиб борган.
Айни вақтда тегишли идоралар томонидан маданий мерос объектига етказилган зарар миқдори аниқланмоқда. Ушбу ҳолат юзасидан тегишли ҳужжатлар Тошкент шаҳар прокуратурасига тақдим этилган.
Изоҳ (0)