Qashqadaryo viloyatining G‘uzor tumanida MFY raisi to‘qqiz gektar yerni 11 million 700 ming so‘mga sotayotganda qo‘lga olindi. Bu haqda “Daryo” manbasi xabar berdi.
Ma’lum bo‘lishicha, holat Bosh prokuratura huzuridagi Iqtisodiy jinoyatlarga qarshi kurashish departamentining viloyat boshqarmasi xodimlari tomonidan fosh etilgan.
Aniqlanishicha, tumandagi 55 yoshli MFY raislaridan biri mahalla hududidagi fermer xo‘jaligiga qarashli 9 gektar yer maydonini boshqa bir shaxsga olib berish uchun undan 11 million 700 ming so‘m talab qilgan.
“Rais kelishilgan pulning 5 million so‘mini avvalroq olgan. Qolgan 6 million 700 ming so‘mini MFY idorasida olayotgan paytda ashyoviy dalillar bilan qo‘lga olindi”, — deydi “Daryo” manbasi.
Qo‘shimcha qilinishicha, MFY raisi Jinoyat kodeksining 168-moddasi 3-qismi bilan (firibgarlik) aybli deb topilib, unga nisbatan jinoyat ishi qo‘zg‘atilgan. Shuningdek, raisga qamoq ehtiyot chorasi qo‘llangan.
Izoh (0)