“Daryo”ga Qashqadaryo viloyatining Qarshi tumanidagi tibbiyot birlashmaga qarashli laboratoriyada faoliyat yurituvchi tibbiyot xodimlari murojaat qilib, rahbariyati tomonidan ishdan bo‘shash haqida ogohlantirish xati berilganini, tez orada 162 nafar tibbiyot xodimi ishsiz qolish ehtimoli borligini ma’lum qildi.
“Biz laboratoriya sohasida ishlaymiz, barchamiz xotin-qizlardan iborat jamoamiz. Qarshi tumanidagi laboratoriya tizimi autsorsing tizimiga o‘tkazilishi munosabati bilan bizga ishdan bo‘shash haqida ogohlantirish xati berildi. Shu sabab biz ishsiz qolishimiz mumkin. Bizga yordam bering”, — deydi videomurojaatdagi ayollardan biri.
Yana bir tibbiyot xodimi prezidentning sohaga e’tibori sabab tibbiyot xodimlarining oylik maoshi oshganidan xursand bo‘lganini, ammo bu o‘zgarish ularning xursandchiligiga chek qo‘yganini aytmoqda.
“Biz ishlayotgan laboratoriya bugungi kunda zamonaviy jihozlar bilan ta’minlandi. Bunga Sizning e’tiboringiz sabab bo‘ldi. Qolaversa, oylik maoshlarimiz ikki baravar oshirildi. Bunday o‘zgarishlardan xursand bo‘lib, shijoat bilan ishlayotganimizda bo‘shashimiz haqida ogohlantirish berishyapti. Shu sabab biz tushkunlikka tushib qoldik. Ko‘plab hamkasblarimiz shu oylik-maoshiga farzandlarini kreditga o‘qitmoqda. Oramizda boquvchisini yo‘qotganlar bor, nogiron boqadiganlar bor. Shu sababli bizga yordam berishingizni so‘raymiz”, — deydi O‘zbekiston prezidentiga murojaat qilgan yana bir tibbiyot xodimi.
Mazkur murojaatga e’tibor qaratgan viloyat hokimining birinchi o‘rinbosari Alisher Qodirov Qarshi tuman tibbiyot birlashmasi boshlig‘iga yuzlanib, tashrif protokolida tizim tajriba sifatida autsorsing tizimiga o‘tishi aytilganini, biroq, shu sabab ishlab turgan xodimlar ishdan bo‘shatilsin deyilmaganini aytib, bosh shifokor Muqaddas Mirsaidovadan bunga izoh so‘raydi.
“Nimaga asoslanib, tibbiyot xodimlariga bo‘shash to‘g‘risida ogohlantirish xati beryapsiz, bu haqda kimdir topshiriq berdimi”, — deydi Alisher Qodirov tuman tibbiyot birlashmasi boshlig‘i qarab.
Bunga javob bergan bosh shifokor boshqarma tarkibidagi inspeksiyadan shu haqda topshiriq kelganini, laboratoriya budjet tizimidan chiqarilayotganini aytadi.
“Hali autsorsing tizimining o‘zi aniq bo‘lmasa, tanlov bo‘lmagan bo‘lsa nega bunaqa ish qilinyapti”, — deydi viloyat hokimi o‘rinbosari.
Tibbiyot birlashma boshlig‘i Muqaddas Mirsaidova esa Hisob palatasidagilar ham 1-sentabrga qadar laboratoriya xodimlari ishdan bo‘shatilishi lozimligini so‘rayotganini ta’kidlaydi.
“Daryo”ning bu haqdagi so‘roviga javob bergan viloyat Sog‘liqni saqlash boshqarmasi mas’ullari masalani quyidagicha izohladi.
Prezidentning 2022-yil 26-yanvardagi PQ-102-sonli qarorining 6-bandiga asosan har bir hududdan bittadan tuman (shahar) tibbiyot birlashmasi muassasalarini markazlashtirish va davlat-sheriklik asosida autsorsingga berish choralarini ko‘rish belgilangan edi.Ma’lum qilinishicha, shu asosda Qarshi tumanida ham mazkur topshiriq ijrosi doirasidagi tadbirlar amalga oshirilmoqda.Mazkur qarorga muvofiq hamda Vazirlar Mahkamasining 2020-yil 10-yanvardagi ‘O‘zbekiston Respublikasi sog‘liqni saqlash vazirligi tuzilmasida tashkilotlarda autsorsing xizmatlari ko‘rsatish tartibi to‘g‘risidagi Nizomni tasdiqlash haqida’gi qarori ilovasi bandi, prezidentning 2022-yil 21—22-aprelda viloyatga tashrifi davomida va Xalq deputatlari viloyat Kengashining navbatdan tashqari sessiyasida bergan topshiriqlari bo‘yicha yig‘ilish bayoni, Sog‘liqni saqlash vazirligining 2022-yil 11-martdagi markazlashgan laboratoriya, sterilizatsiya va yuqori tekshiruvlar tizimini tashkil etishga oid chora-tadbirlar rejasi ijrosi doirasida 2022-yil 1-sentabrga qadar viloyatning Qarshi tumani va Shahrisabz shahridagi laboratoriyalarni markazlashtirish va davlat-xususiy sheriklik asosida autsorsingga berish topshirig‘i berilgan”, — deyiladi viloyat SSB izohida.
Bu xususida Qarshi tumani tibbiyot birlashmasida laboratoriyalarda faoliyat ko‘rsatayotgan tibbiyot xodimlari ishtirokida yig‘ilish o‘tkazilib, yuqoridagi me’yoriy hujjatlar talablari bo‘yicha batafsil tushuntirish ishlari olib borilgan. Mazkur yo‘nalishdagi xodimlarga O‘zbekiston Respublikasi Mehnat kodeksining 100-moddasi 2-qismi 1-bandiga asosan tuzilgan mehnat shartnomasi muddatidan oldin bekor qilinishi haqida ogohlantirish xatlari berilgan va bu yo‘nalishdagi huquqlari tushuntirilgan”, — deydi boshqarma axborot xizmati mas’uli Nuriddin Egamov.Egamovning qo‘shimcha qilishicha, laboratoriya autsorsing tizimiga o‘tkazilgan taqdirda ham ishchilar ishsiz qolmaydi.
Qarshi tumani tibbiyot birlashmasida faoliyat ko‘rsatayotgan laboratoriya xodimlari ishsiz qolmaydi. Balki birlashmaning laboratoriya xizmati autsorsing shartnomasi orqali o‘tkazilgan xo‘jalik yurituvchi subyekt tomonidan qayta tanlov o‘tkazilib, yetarli malakaga ega bo‘lgan xodimlar to‘liq ish bilan ta’minlanadi. 2023-yilga qadar birlashmaning laboratoriya xizmati xodimlarining ish haqlari budjet mablag‘lari hisobidan xodimlar soniga mutanosib ravishda tuman moliya bo‘limidan to‘lab beriladi”, — deydi u.Qayd etilishicha, xususiy tadbirkor tomonidan shifoxona laboratoriya xizmatining moddiy texnika bazasi rivojlantiriladi, yangi tibbiy asbob-uskunalar jalb etiladi, bemorlar uzoq hududlarga qatnab yurishining oldi olinadi, yangi labaratoriya xizmat turlari joriy etiladi.
Izoh (0)