Британия ҳарбий разведкаси 21 август куни сунъий йўлдошдан олинган суратни эълон қилди, унда Запорожье атом электр станциясининг бешинчи энергетика блокидан тахминан 60 метр узоқликда жойлашган учта зирҳли транспортёр ва иккита ҳарбий юк машинасини кўриш мумкин.
«21 август куни олинган сунъий йўлдош тасвирлари Россия Запорожье АЭСда оғир ҳарбий иштирокини сақлаб қолаётганини кўрсатди: зирҳли транспорт воситалари 5-реактордан тахминан 60 метр узоқликда жойлашган. Россия армияси ҳарбий машиналарни қувур ва кўприклар остига қўйиб, бекитишга уринган бўлиши мумкин», — дейилади Британия разведкаси баёнотида.
Запорожье АЭС ҳудудида ҳарбий техникалар борлиги ҳақида ОАВ ва Украина расмийлари бир неча бор хабар қилган. 5 август куни The Insider нашри АЭСдаги манбаларга таяниб, у ерда зирҳли транспортёрлар, зенит қурилмалари ва радиокимёвий разведка учун ускуналар жойлашганини ёзганди. 16 август куни станция ходимининг Reuters агентлигига айтишича, АЭСга ишчилар кириб келаётган пайтда зирҳли транспортёрлар стволларини станция кираверишига қаратади.
Россия эса Запорожье АЭС ҳудудида ҳарбий техникалари йўқлигини даъво қилмоқда.
18 август куни ижтимоий тармоқларда АЭСнинг ядро реакторига уланган машинаси хонасидан олингани видео пайдо бўлди. Американинг CNN телеканали видеонинг ҳақиқийлигини тасдиқлади.
Запорожье АЭС — Европадаги энг йирик атом электр станцияси, у Украинанинг Энергодар шаҳрида жойлашган. Март ойидан бери станция, шаҳарнинг ўзи каби рус қўшинлари томонидан назорат қилинмоқда. Август ойи бошидан буён станция ҳудуди ўққа тутилмоқда. Россия ва Украина ҳужумда бир-бирини айбламоқда.
Изоҳ (0)