AQSH prezidentining rafiqasi Jill Bayden COVID-19 infeksiyasini qayta yuqtirib oldi, deya xabar bermoqda The Hill. Avgust oyi boshida ham unda koronavirus aniqlangandi.
“Birinchi xonimda kasallik simptomlari rivojlanmagan. U Delaverda izoytasiyada qoladi”, — dedi Jill Baydenning vakili Kelsi Donoxyu o‘z bayonotida.
Birinchi xonim to‘liq emlangan, koronavirusga qarshi ikkita buster dozani ham olgan.
O‘z navbatida, Oq uy AQSH prezidenti Jo Baydenning 24-avgust kuni koronavirusga topshirgan testi manfiy chiqqanini ma’lum qildi. Biroq, u so‘nggi kunlarda rafiqasi bilan ta’til o‘tkazgani sababli COVID-19 uchun qayta test topshirishi mumkin. Bundan tashqari, keyingi 10 kun davomida Bayden yopiq ommaviy tadbirlarda niqob taqadi.
AQSH prezidenti ham yozda ikki marta koronavirus bilan kasallandi. Baydenda kasallik birinchi marta 21-iyulda aniqlangan. Bir necha kundan keyin uning COVID-19 testi manfiy natija berdi, ammo 30-iyul kuni unga yana koronavirus tashxisi qo‘yildi. 6-avgust kuni prezident kasallikdan tuzalgani ma’lum bo‘ldi.
Baydenni davolovchi shifokor kasallikning qaytalanishi ehtimoli haqida ogohlantirgan, chunki bu muolajada Paxlovid preparati qo‘llanilgan bemorlarda uchraydi.
Bayden COVID-19 vaksinasining to‘liq kursini olgan, shuningdek, ikkita buster doza bilan ham emlangan.
Izoh (0)