АҚШ президентининг рафиқаси Жилл Байден COVID-19 инфекциясини қайта юқтириб олди, дея хабар бермоқда The Hill. Август ойи бошида ҳам унда коронавирус аниқланганди.
«Биринчи хонимда касаллик симптомлари ривожланмаган. У Делаверда изойтасияда қолади», — деди Жилл Байденнинг вакили Келси Донохю ўз баёнотида.
Биринчи хоним тўлиқ эмланган, коронавирусга қарши иккита бустер дозани ҳам олган.
Ўз навбатида, Оқ уй АҚШ президенти Жо Байденнинг 24 август куни коронавирусга топширган тести манфий чиққанини маълум қилди. Бироқ, у сўнгги кунларда рафиқаси билан таътил ўтказгани сабабли COVID-19 учун қайта тест топшириши мумкин. Бундан ташқари, кейинги 10 кун давомида Байден ёпиқ оммавий тадбирларда ниқоб тақади.
АҚШ президенти ҳам ёзда икки марта коронавирус билан касалланди. Байденда касаллик биринчи марта 21 июлда аниқланган. Бир неча кундан кейин унинг COVID-19 тести манфий натижа берди, аммо 30 июль куни унга яна коронавирус ташхиси қўйилди. 6 август куни президент касалликдан тузалгани маълум бўлди.
Байденни даволовчи шифокор касалликнинг қайталаниши эҳтимоли ҳақида огоҳлантирган, чунки бу муолажада Paxlovid препарати қўлланилган беморларда учрайди.
Байден COVID-19 вакцинасининг тўлиқ курсини олган, шунингдек, иккита бустер доза билан ҳам эмланган.
Изоҳ (0)