AQSH Ukrainaga salkam 3 milliard dollarlik eng yirik harbiy yordam paketini taqdim etishi kutilayotgani haqida xabar berilgandi. Bayden Ukraina xalqini Mustaqillik kuni bilan tabriklab, ushbu yordam paketi berilishini ma’lum qildi.
Prezident Baydenning Ukraina Mustaqillik kunidagi bayonotiga ko‘ra, o‘tgan olti oy ichida ukrainaliklar o‘z jasorati va ozodlik yo‘lida ko‘rsatayotgan fidoyiliklari bilan dunyoni ilhomlantirdi. Ular Rossiyaning Ukrainaga to‘liq miqyosda bostirib kirishi qarshisida qat’iy va kuchli tura oldi. Bugungi kun nafaqat o‘tmishga daxldor bayram, balki Ukraina suveren va mustaqil davlat ekani va shunday bo‘lib qolishini tasdiqlovchi kundir.
Amerika Qo‘shma Shtatlari Ukraina xalqi o‘z suverenitetini himoya qilish uchun kurashni davom ettirayotganda ularni qo‘llab-quvvatlashga sodiqdir. Ushbu majburiyatning bir qismi sifatida men bugungi kunga qadar xavfsizlik bo‘yicha yordamimizning eng katta qismini e’lon qilishdan faxrlanaman: taxminan 2,98 milliard dollarlik qurol va jihozlar Ukrainaga xavfsizlikka ko‘maklashish tashabbusi orqali taqdim etiladi. Bu Ukraina uzoq muddatda o‘zini himoya qilishda davom etishini ta’minlash uchun havo hujumidan mudofaa tizimlari, artilleriya tizimlari va o‘q-dorilar, uchuvchisiz havo tizimlari va radarlarni sotib olishga imkon beradi.So‘nggi marta 19-avgust kuni AQSH Ukrainaga 775 million dollarlik navbatdagi yordam paketini ajratgandi. U HIMARS baravar o‘t ochish reaktiv tizimi uchun o‘q-dorilar, 16 ta gaubitsa, mingta Javelin tankka qarshi raketalari, razvedka uchun 15 ta ScanEagle dronlari, 40 ta zirhli mashina, HARM radiolokatsiyaga qarshi raketalar, 1,5 mingta TOW tankka qarshi raketa majmualari, minadan tozalash vositalari va Hummer harbiy avtomobillarini o‘z ichiga oldi.Bilaman, bu mustaqillik kuni ko‘plab ukrainaliklar uchun alamli bo‘ldi, chunki minglab odamlar halok bo‘ldi yoki yaralandi, millionlab odamlar o‘z uylarini tashlab ketdi va yana ko‘p odamlar Rossiya hujumlari qurboni bo‘ldi. Ammo olti oylik tinimsiz hujumlar ukrainaliklarning o‘zlari, o‘z mamlakati va o‘ttiz bir yillik mustaqilligi bilan faxrlanishiga yanada kuch qo‘shadi. Bugun, har kuni biz Ukraina xalqi bilan birgamiz. Amerika Qo‘shma Shtatlari Ukrainaning demokratik, mustaqil, suveren va gullab-yashnagan davlat sifatida davom etishini intiqlik bilan kutmoqda, — deydi Bayden.
Keyinroq Politico nashri AQSH harbiy yordam doirasida Ukrainaga ba’zi turdagi qurol-yarog‘lar yetkazib berilayotgani haqida ma’lum qilmayotgan bo‘lishi mumkinligi haqida yozdi.
Izoh (0)