Зеленский Эрдўғон ва Гутерриш билан учрашувдан кейин: Россия қўшинлари Украинани тарк этса, РФ билан музокаралар ўтказиш мумкин. Эрдўғон Путин билан учрашувни муҳокама қилишга ваъда берди

Агар Россия қўшинлари Украинанинг босиб олинган ҳудудларини тарк этса, Россия билан музокаралар ўтказиш мумкин бўлади. Бу ҳақда Украина президенти Владимир Зеленский Туркия президенти Ражаб Тоййиб Эрдўғон ва БМТ бош котиби Антониу Гутерриш билан Львовда бўлиб ўтган музокаралардан кейин маълум қилди, деб ёзади Meduza.

Зеленскийнинг сўзларига кўра, Эрдўғон учрашув чоғида Украина донини экспорт қилиш бўйича ташаббус урушни тўхтатиш ҳақидаги келишувлар учун «дипломатик дарча» очишини айтган.

«Мен Туркиянинг жаноб президентига Россияга ишонч йўқлиги ҳақида ўз фикримни айтдим. Менинг фикримча, бу ‘дарча’да Россия қуроли бор. Улар (Россия) қанақадир сулҳга тайёрлигидан жуда ҳайратдаман. Ўлдирадиган, зўравонлик қиладиган, ҳар куни шаҳарларимизни ўққа тутадиган одамлар тинчлик тарафдори бўлиши мумкин эмас. Шунинг учун, дастлаб, менимча, улар бизнинг ҳудудларимизни озод этиши керак, кейин эса… Кейин нима бўлиши кейин маълум бўлади», — деди Украина президенти.

Украина ташқи ишлар вазири Дмитрий Кулеба уч томонлама музокаралардан кейин Украинани «ҳеч ким Россия фойдасига ён беришга ундамагани»ни айтди.

Ўз навбатида, Эрдўғоннинг фикрича, халқаро ҳамжамият Украинадаги вазият бўйича дипломатик жараённи «жонлантириш» учун ўзига кўпроқ масъулият олиши керак. Туркия президенти Россия президенти Владимир Путин билан Львовдаги уч томонлама учрашув натижаларини муҳокама қилмоқчи.

Музокараларнинг учинчи иштирокчиси — БМТ бош котиби Гутерриш офиси томонлар вазиятни тартибга солишни муҳокама қилганини тасдиқлади. «Аммо биз жанговар ҳаракатларни тўлиқ тўхтатиш бўйича саъй-ҳаракатларни муҳокама қилишимиз мумкин бўлган вақтдан ҳали жуда узоқдамиз», — деди БМТ матбуот хизмати вакили.

Уч томонлама саммит олдидан CNN Turk Владимир Путин Эрдўғон билан август бошида Сочида бўлиб ўтган учрашув чоғида Зеленский билан музокаралар имкониятига ишора қилгани ҳақида хабар берганди. Телеканал манбалари қайд этишича, бундай учрашув истиқболлари Украина етакчисининг Эрдўғон ва Гутерриш билан саммити натижаларига боғлиқ бўлади.