Буюк Британияда 1970—1980 йилларда қон қуйиш орқали ОИВ ва гепатит C юқтириб олган ҳамда бугунги кунда ҳам тирик бўлган минглаб беморлар 100 000 фунт стерлинг (120 минг доллар) миқдорида товон пули олади. Бу ҳақда бош вазир Борис Жонсоннинг баёнотига таяниб, The Independent нашри хабар берди.
«Бундай аянчли адолатсизликка учраганларнинг азоб-уқубатлари ўрнини ҳеч нарса билан қоплаб бўлмаса-да, биз қурбонлар ва фожиали тарзда ўз жуфтини йўқотганлар учун компенсация тўлаш чораларини кўряпмиз» — деди у.
Жабрланувчиларнинг даъво қилишича, компенсация ОИВдан жабрланганларнинг аксариятига ёрдам бермайди, чунки тўлов касалланганларнинг оила аъзоларига эмас фақат жуфтларига тааллуқли бўлади. Қайд этилишича, компенсация оладиганлар рўйхатини кенгайтириш тергов ишлари якунланганидан кейин амалга оширилиши мумкин. Қон қуйиш орқали инфекцияга чалинганлар бўйича тергов 2017 йилда бошланган ва 2023 йилда тугаши керак. Иш бўйича ҳозирга қадар 5000 га яқин гувоҳнинг кўрсатмалари тўпланган.
Жабрланувчиларнинг аксарияти илгари гемофилия ёки қон ивишининг бузилиши билан оғриган ва уларга қон ивиши бўйича VIII омил препарати берилган. Бу дори Америкада ишлаб чиқарилган бўлиб, у донорлиги учун ҳақ тўланган одамлардан олинган, улар орасида гиёҳвандлар ва маҳкумлар ҳам бўлган. Беморлар ҳукуматнинг огоҳлантиришларига қарамай, узоқ йиллар давомида ушбу дорини истеъмол қилган. ОИВ ва гепатит ҳолатлари ҳам ўнлаб йиллар давомида аниқланган.
The Independent таъкидлашича, 2,4 мингга яқин одам ушбу инфекциялар оқибатида вафот этган.
Изоҳ (0)