O‘zbekistondagi maktablar atrofida shakarli, gazlangan va energetik ichimliklar, shuningdek, tez tayyorlangan taomlar savdosi taqiqlanishi kutilmoqda. Bu haqda “2022—2026-yillarda O‘zbekiston Respublikasida o‘smirlar salomatligi va farovonligini mustahkamlash bo‘yicha Milliy Harakatlar Strategiyasi va uni amalga oshirish chora-tadbirlari dasturini tasdiqlash to‘g‘risida” Vazirlar Mahkamasi qarori loyihasida qayd etilgan.
Hujjat loyihasiga ko‘ra, o‘smirlik davrining salomatlik borasida muammolari mavjudligi hamda ushbu muammolar yechimini amalga oshirishda tizimli va yangicha yondashuv zarurligi davr talabi bo‘lib qolmoqda.
Xususan, 2017-yilda o‘tkazilgan Ovqatlanish bo‘yicha tadqiqotlarga ko‘ra, 5—19 yoshdagi bolalar va o‘smirlar orasida ortiqcha vaznning paydo bo‘lishi o‘g‘il bolalar o‘rtasida 8,4 foizdan 16,3 foizga, qizlar o‘rtasida 11 foizdan 17 foizga, semizlik esa o‘g‘il bolalarda 2 foizdan 5 foizgacha va qizlarda 1 foizdan 3 foizgacha o‘sdi. Qizlar o‘rtasida noto‘g‘ri ovqatlanish va mikroelementlarning yetishmasligi esa, kelajakdagi homiladorlikning og‘ir asoratlariga sabab bo‘ladi.
Shu sababli 2022—2026-yillarda O‘zbekistonda o‘smirlar salomatligi va farovonligini mustahkamlash bo‘yicha Milliy Harakatlar Strategiyasi hamda ushbu strategiyani amalga oshirish chora-tadbirlar dasturi tasdiqlanadi.
Unga ko‘ra, 2022-yil 1-sentabrdan Maktablar va ularning atrofida shakarli, gazlangan va energetik ichimliklar, shuningdek tez tayyorlangan taomlar savdosi 500 metr atrofidan kam bo‘lmagan hududlarda savdo taqiqlanadi.
Buning natijasida o‘smirlar salomatligi mustahkamlanishi, shuningdek, ovqatlanish bilan bog‘liq kasalliklar oldi olinishi kutilmoqda.
Izoh (0)