Ўзбекистондаги мактаблар атрофида шакарли, газланган ва энергетик ичимликлар, шунингдек, тез тайёрланган таомлар савдоси тақиқланиши кутилмоқда. Бу ҳақда «2022—2026 йилларда Ўзбекистон Республикасида ўсмирлар саломатлиги ва фаровонлигини мустаҳкамлаш бўйича Миллий Ҳаракатлар Стратегияси ва уни амалга ошириш чора-тадбирлари дастурини тасдиқлаш тўғрисида» Вазирлар Маҳкамаси қарори лойиҳасида қайд этилган.
Ҳужжат лойиҳасига кўра, ўсмирлик даврининг саломатлик борасида муаммолари мавжудлиги ҳамда ушбу муаммолар ечимини амалга оширишда тизимли ва янгича ёндашув зарурлиги давр талаби бўлиб қолмоқда.
Хусусан, 2017 йилда ўтказилган Овқатланиш бўйича тадқиқотларга кўра, 5—19 ёшдаги болалар ва ўсмирлар орасида ортиқча вазннинг пайдо бўлиши ўғил болалар ўртасида 8,4 фоиздан 16,3 фоизга, қизлар ўртасида 11 фоиздан 17 фоизга, семизлик эса ўғил болаларда 2 фоиздан 5 фоизгача ва қизларда 1 фоиздан 3 фоизгача ўсди. Қизлар ўртасида нотўғри овқатланиш ва микроэлементларнинг етишмаслиги эса, келажакдаги ҳомиладорликнинг оғир асоратларига сабаб бўлади.
Шу сабабли 2022—2026 йилларда Ўзбекистонда ўсмирлар саломатлиги ва фаровонлигини мустаҳкамлаш бўйича Миллий Ҳаракатлар Стратегияси ҳамда ушбу стратегияни амалга ошириш чора-тадбирлар дастури тасдиқланади.
Унга кўра, 2022 йил 1 сентябрдан Мактаблар ва уларнинг атрофида шакарли, газланган ва энергетик ичимликлар, шунингдек тез тайёрланган таомлар савдоси 500 метр атрофидан кам бўлмаган ҳудудларда савдо тақиқланади.
Бунинг натижасида ўсмирлар саломатлиги мустаҳкамланиши, шунингдек, овқатланиш билан боғлиқ касалликлар олди олиниши кутилмоқда.
Изоҳ (0)