Farg‘onadagi zavodning ishchisi o‘zini yoqib yuborib vafot etgan, Qashqadaryodagi zavodning esa ish paytida og‘ir tan jarohati olgan xodimlari bilan bog‘liq jarayon o‘rganilayotgani ma’lum qilindi. Bu haqda AOKAda bo‘lib o‘tgan matbuot anjumanida Bandlik va mehnat munosabatlari vaziri ma’lumot berdi.
“Har ikki holat — Farg‘onada ustiga benzin quyib o‘zini yoqib yuborgan va so‘ngra vafot etgan, Qashqadaryodagi GTL zavodining avariya sabab jarohat olgan xodimlari bilan bog‘liq jarayon e’tiborimizda. Mazkur masalalar haqidagi batafsil ma’lumot vazirlik ishchi guruhi xulosasidan so‘ng jamoatchilikka ma’lum qilinadi”, — deydi vazir Nozim Husanov.
Vazirning aytishicha, Farg‘ona va Qashqadaryodagi zavod ishchilari bilan bog‘liq ko‘ngilsiz voqealardan so‘ng vazirlik tashabbusi bilan ishchi guruh tuzilgan.
“Bunaqa voqealardan so‘ng har doim Bandlik va mehnat munosabatlari vazirligi tashabbusi bilan hamkor tashkilotlar ishtirokida ishchi guruh tuzilib, xodimning mehnat faoliyati bilan bog‘liq holatlar o‘rganib chiqiladi”, — deydi vazir.
Eslatib o‘tamiz, 2022-yilning 18-iyun kuni Qashqadaryodagi GTL zavodida avariya yuz bergani, bir kishi vafot etib, ikki kishi kuyish jarohati olgani xabar berilgandi. “O‘zbekneftgaz” AJ axborot xizmati buni rad etib, holat odatiy ish jarayonlaridan biri ekanini bildirgandi. Farg‘ona neftni qayta ishlash zavodining 48 yoshli xodimi esa 2-avgust kuni rahbariyatidan norozilik belgisi sifatida ustiga benzin sepib, yoqib yuborgandi. Voqeani izohlagan zavod mas’ullari ayol ishdan bo‘shatilmaganini, faqat vazifasi o‘zgarganini aytib chiqqandi. Bir hafta shifoxonada davolangan zavod ishchisi 2022-yilning 10-avgust kuni vafot etdi. Zavod rahbariyati esa ayolning yetim qolgan to‘rt nafar qizi va ishsiz erini otaliqqa olganini e’lon qildi.
Izoh (0)