Qozog‘iston sentabr oyidan o‘z neftining bir qismini Rossiyani chetlab o‘tib, Ozarbayjon quvurlari orqali yetkazib berish va sotish niyatida. Bu haqda Reuters xabar berdi.
U Ozarbayjon orqali kuniga taxminan 100 ming barrel yoki Kaspiy quvuri konsorsiumi orqali tashiladigan hajmning 8 foizini sotmoqchi.
20 yil davomida Qozog‘istondan neft yetkazib berish Rossiyaning Qora dengizdagi Novorossiyskdagi CPC quvurlari orqali amalga oshirilgan.
CPC Qozog‘istonni Novorossiysk yaqinidagi dengiz porti bilan bog‘laydigan quvur liniyasi tizimi bo‘lib, u yerda neft jahon bozorlariga jo‘natish uchun tankerlarga yuklanadi.
Biroq iyul oyida shahar sudi neft to‘kilishini bartaraf etish rejasini buzgani uchun CPC faoliyatini 30 kunga to‘xtatib qo‘ygani sababli Qozog‘iston muqobil yo‘llarni izlay boshladi.
Qozog‘istonning “KazMunayGaz” milliy kompaniyasi hozirdanoq Ozarbayjon davlat neft kompaniyasi bilan neft yetkazib berish bo‘yicha dastlabki muzokaralar olib bormoqda.
Qozog‘iston tomoni Ozarbayjon neft quvuri Boku—Tbilisi—Jayhon orqali yiliga 1,5 mln tonna yoqilg‘i sotishni rejalashtirmoqda.
Bu orqali Qozog‘iston kuniga sal ko‘proq — 30 ming barrel neft sotish imkoniyatiga ega bo‘ladi, ayni paytda mamlakatning butun eksporti jahon neftining 1 foizdan ortig‘ini yoki kuniga taxminan 1,4 mln barrelni tashkil qiladi.
Tomonlar neftni tashish bo‘yicha yakuniy shartnomani avgust oyi oxirida imzolash niyatida, yetkazib berish esa kuzda boshlanadi.
Shuningdek, Qozog‘iston 2023-yildan boshlab Gruziyaga ketadigan boshqa Ozarbayjon quvuri Boku–Supsa orqali yiliga 3,5 mln tonna neft yetkazib berishni rejalashtirmoqda.
Avvalroq Qozog‘iston Yevrosiyo taraqqiyot banki nazoratini qo‘lga kiritishi mumkinligi haqida xabar berilgandi.
Izoh (0)