Қозоғистон сентябрь ойидан ўз нефтининг бир қисмини Россияни четлаб ўтиб, Озарбайжон қувурлари орқали етказиб бериш ва сотиш ниятида. Бу ҳақда Reuters хабар берди.
У Озарбайжон орқали кунига тахминан 100 минг баррель ёки Каспий қувури консорсиуми орқали ташиладиган ҳажмнинг 8 фоизини сотмоқчи.
20 йил давомида Қозоғистондан нефть етказиб бериш Россиянинг Қора денгиздаги Новороссийскдаги CPC қувурлари орқали амалга оширилган.
CPC Қозоғистонни Новороссийск яқинидаги денгиз порти билан боғлайдиган қувур линияси тизими бўлиб, у ерда нефть жаҳон бозорларига жўнатиш учун танкерларга юкланади.
Бироқ июль ойида шаҳар суди нефть тўкилишини бартараф этиш режасини бузгани учун CPC фаолиятини 30 кунга тўхтатиб қўйгани сабабли Қозоғистон муқобил йўлларни излай бошлади.
Қозоғистоннинг «КазМунайГаз» миллий компанияси ҳозирданоқ Озарбайжон давлат нефть компанияси билан нефть етказиб бериш бўйича дастлабки музокаралар олиб бормоқда.
Қозоғистон томони Озарбайжон нефть қувури Боку—Тбилиси—Жайҳон орқали йилига 1,5 млн тонна ёқилғи сотишни режалаштирмоқда.
Бу орқали Қозоғистон кунига сал кўпроқ — 30 минг баррель нефть сотиш имкониятига эга бўлади, айни пайтда мамлакатнинг бутун экспорти жаҳон нефтининг 1 фоиздан ортиғини ёки кунига тахминан 1,4 млн баррелни ташкил қилади.
Томонлар нефтни ташиш бўйича якуний шартномани август ойи охирида имзолаш ниятида, етказиб бериш эса кузда бошланади.
Шунингдек, Қозоғистон 2023 йилдан бошлаб Грузияга кетадиган бошқа Озарбайжон қувури Боку–Супса орқали йилига 3,5 млн тонна нефть етказиб беришни режалаштирмоқда.
Аввалроқ Қозоғистон Евросиё тараққиёт банки назоратини қўлга киритиши мумкинлиги ҳақида хабар берилганди.
Изоҳ (0)