Samarqand viloyatida onasi tergov hibsxonasida bo‘lgan voyaga yetmagan bolalar davlat himoyasiga olindi. Bu haqda Oliy Majlisning Inson huquqlari bo‘yicha vakili (ombudsman) axborot xizmati xabar bermoqda.
Inson huquqlari bo‘yicha vakilga viloyatning Kattaqo‘rg‘on shahridagi 7-sonli tergov hibsxonasida saqlanayotgan fuqaro X.N. murojaat qilib, uch nafar voyaga yetmagan farzandi borligini va ular mahbusning otasi D.A. bilan birga yashayotganini inobatga olib, farzandlari uchun otasini vasiy etib tayinlashda amaliy yordam so‘ragan.
Ushbu murojaat nazoratga olinib, o‘rganish uchun ombudsmanning Samarqand viloyatidagi mintaqaviy vakiliga yuborilgan. Ushbu murojaat ombudsmanning mintaqaviy vakili, Qo‘shrabot tuman hokimligi va “SOS O‘zbekiston Bolalar mahallalari” uyushmasining Samarqand shahridagi filiali bilan hamkorlikda o‘rganildi. Murojaatchi X.N. bilan Kattaqo‘rg‘on shahridagi 7-sonli tergov hibsxonasida uchrashilib, murojaatdagi sabablar o‘rganib chiqildi.
Murojaatchi X.N.ning otasi D.A.ni bolalarga vasiy etib tayinlash uchun uning oilaviy sharoitlari o‘rganildi. Aniqlanishicha, D.A.ning 2-turmush o‘rtog‘idan 3 nafar voyaga yetmagan farzandi bor va ular otasining qaramog‘ida. Bundan tashqari, murojaatchi X.N.ning yana 3 nafar farzandining kunlik ehtiyojlari uchun uyda moddiy sharoitlar mavjud emas.
Yuqoridagilarni inobatga olinib, murojaatchi X.N.ning 3 nafar farzandi Qo‘shrabot tumani hokimligi hamkorligida “SOS O‘zbekiston Bolalar mahallalari” uyushmasining Samarqand shahridagi filialiga joylashtirildi.
Murojaatchi X.N.ga 3 nafar farzandi filialga joylashtirilgani, u yerning yashash sharoitlari yaxshi ekani, farzandlari yozgi lager va bog‘chaga borayotgani to‘g‘risida ma’lumotlar berildi.
Izoh (0)