Rossiyaning Perm shahridagi o‘zbek diasporasi Ukraina bilan urushda Rossiyani qo‘llab-quvvatlovchi Amir Temur nomidagi batalyonni tuzgani xabar qilingandi. Tashqi mehnat migratsiyasi agentligi holatga munosabat bildirdi.
“O‘zbekiston fuqarolaridan bunday da’vatlarga ergashmaslikni, ziddiyatli hududlarga bormaslikni va harbiy harakatlarda ishtirok etmaslikni so‘raymiz.
O‘zbekiston Respublikasi Jinoyat kodeksining 154-1-moddasida chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollanish uch yildan besh yilgacha ozodlikni cheklash yoxud uch yildan besh yilgacha ozodlikdan mahrum qilish bilan jazolanishi ko‘zda tutilgan”, — deyiladi xabarda.
Eslatib o‘tamiz, ijtimoiy tarmoqlarda tarqalgan videoda “Permdagi O‘rta Osiyo o‘zbeklari jamiyati” qurultoyida uning rahbari Jahongir Jalolov Rossiyaning Ukrainani demilitarizatsiya qilish va denatsiyalashtirish bo‘yicha maxsus harbiy operatsiyasini qo‘llab-quvvatlash kerakligini ta’kidlagan.
Farzandlarimiz bog‘chalarga qatnaydi, maktab va oliy o‘quv yurtlarida tahsil oladi. Rossiyada yashaymiz va ishlamoqdamiz. Yeyayotgan nonimizni oqlashimiz kerak. Men ko‘ngillilar batalyonini tuzib, uni Amir Temurning buyuk nomi deb atashni taklif qilaman. Va Rossiyaning Ukrainani demilitarizatsiya va denatsifikatsiya qilish bo‘yicha maxsus harbiy operatsiyasini qo‘llab-quvvatlashga chaqiraman.Men o‘zbek ekanimdan, Rossiya fuqarosi ekanimdan, prezidentim Vladimir Vladimirovich Putin ekanidan faxrlanaman. Vatan uchun men Rossiyaga xizmat qilaman! — degan u.
Izoh (0)