Respublikada 5 million 500 ming nafar o‘quvchi o‘rni mavjud. O‘quvchi bolalarning soni esa 6 million nafardan ortiq. Bu haqda Xalq ta’lim vazirining birinchi o‘rinbosari Usmon Sharifxo‘jayev “Daryo” muxbiriga bergan intervyusida aytib o‘tdi.
“Daryo” muxbiri Usmon Sharifxo‘jayevdan respublika bo‘ylab maktablarda o‘quvchi bolalar to‘liq qamrab olinmagani, hali ham bu borada kamchiliklar borligi va maktablar yetishmovchiligi haqida so‘radi.
Xalq ta’lim vaziri birinchi o‘rinbosarining aytishicha, “Ta’lim to‘g‘risidagi” qonun bo‘yicha 1—11-sinflar uchun majburiy ta’lim belgilangan.
“Men hozir 100 foiz qamrov bo‘lgan desam, yolg‘on bo‘lishi mumkin. Sababi, o‘qishga ota-onasi tomonidan cheklov qo‘yilayotgan, maktabga yuborilmaydigan bolalar bo‘lishi mumkin. Bizga 10-11 yoshda ham hali maktabga chiqmagan degan holat bilan kelishadi. Lekin ular, masalan, 6 million nafar maktab bolalarining ichida 100 ta bo‘lishi mumkin. Yana bir masala – o‘quv o‘rni masalasi. Respublikada hozir 5 million 500 ming nafar atrofida o‘quvchi o‘rni bor. Bolalarning soni 6 million nafardan ortiq, yangi o‘quv yilidan yana oshadi. Ko‘rinib turibdiki, agar butun respublikani bo‘lsangiz birga-bir tushmaydi. Agar shunday tushganida barcha maktablarda bir smena dars bo‘lar edi. Bu ham nisbiy, chunki qaysidir maktabda 0,7, qaysidir birida 1, qaysidirida 2 koeffitsient bo‘lishi mumkin. Umumiy oladigan bo‘lsak, 5,5 million o‘ringa 6,2 million nafar bola bor”, — deydi u.
Usmon Sharifxo‘jayevning so‘zlariga ko‘ra, 2022—2026-yillarga mo‘ljallangan “Maktablarni rivojlantirish milliy dasturi” qabul qilingan.
“Davlatimiz rahbarining farmonida 1,2 million qo‘shimcha o‘quvchi o‘rni vazifasi belgilangan. O‘zimizning alohida qarorimizda buning aniq raqamlari bor, davlat budjetining hisobidan keyingi 5 yilda 700—800 ming o‘rin yaratish aniq belgilangan. Qolgan o‘rinlar qanday shakllanadi degan savol tug‘ilishi mumkin. Yildan-yilga orttirilgan budjet, tashabbuskor o‘quv budjeti tomonidan qo‘shimcha o‘quvchi o‘rinlari yaratish imkoniyati paydo bo‘ladi. Bundan tashqari xususiy maktablar bor, ularni ham rivojlantirib, ularga ham sharoitlar qilinmoqda. Ularning ham har bir maktabi ochilsa 400—500 o‘quvchi o‘rni qo‘shimcha bo‘ladi. Chunki biz jami o‘quvchi o‘rnini sanashimiz kerak bo‘ladi. Reja bor, ko‘p jihatlar mablag‘ga borib taqaladi. Maktablarning samarali qurilishi, kerak joylarga qurilishi, o‘z navbatida kelgusida borgan sari o‘quvchi o‘rniga bo‘lgan ehtiyojni pasaytirishga qaratilgan”, — deydi xalq ta’lim vazirining birinchi o‘rinbosari.
Mutasaddining ta’kidlashicha, maktablarni bitirayotgan o‘quvchilarga nisbatan kelayotgan o‘quvchilar soni har yili 40—50 ming nafarga oshib boradi.
“Bu biz uchun oldimizga katta vazifalar qo‘yayotgan masala. Bu faqatgina Xalq ta’lim vazirligi darajasidagi masala emas, buni Qurilish vazirligi, hokimliklar darajasida birga hal qilishimiz kerak. Biz ehtiyojimiz borligini aytishga tayyormiz, qayerda nima muammo ekanligini ko‘rsatamiz. Lekin qurilish masalasi borgan sari hududlarga, aholining ehtiyojlariga moslashayotganligi inobatga olsak, ularda ham bunga ishtiyoq va taklif bo‘lsa yaxshi bo‘lar edi”, — deya qo‘shimcha qiladi Usmon Sharifxo‘jayev.
Izoh (0)