Oliy Majlis Qonunchilik palatasining 9-avgust kuni bo‘lib o‘tgan navbatdagi majlisida “O‘zbekiston Respublikasining Ma’muriy javobgarlik to‘g‘risidagi kodeksiga o‘zgartishlar kiritish haqida”gi qonun loyihasi qabul qilindi.
Taklif etilayotgan qonun loyihasi bilan Ma’muriy javobgarlik to‘g‘risidagi kodeksida nazarda tutilgan daraxtlarni qonunga xilof ravishda kesish, kundakov qilish, shikastlantirish bo‘yicha javobgarlik masalasi maqbullashtirilmoqda.
Ya’ni bitta moddada mazkur huquqbuzarlikka nisbatan javobgarlikni belgilash huquqni qo‘llash amaliyotida turli xil noaniqliklar keltirib chiqarishini, ayni bir qilmishni bir necha ma’muriy huquqbuzarliklar deb kvalifikatsiya qilinishining oldini oladi.
Avvalroq Toshkent shahri Chilonzor tumanida katta daraxtlarning ildiziga shikast yetkazilgani haqida xabar berilgandi. Bosh prokuratura tomonidan rekonstruksiya qilish jarayonida daraxtlarga zarar yetkazilgani holati tekshirilgan.
Qayd etilishicha, mutaxassislar tomonidan Chilonzor shohko‘chasidagi qurilish hududida mavjud bo‘lgan 108 ta daraxt ahvoli o‘rganilgan. O‘rganishda 7 ta eman daraxtining tomir qismi ochilishi oqibatida shikast yetkazilgani hamda daraxtlar xavf ostida qolgani aniqlangan.
Mazkur holat yuzasidan Jinoyat kodeksining 198-moddasi 3-qismi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zg‘atilib, tergov harakatlari olib borilgan.
Shuningdek, Toshkent shahri hokimligi ham holat yuzasidan munosabat bildirgan. Katta daraxtlar ildiziga shikast yetkazgan tashkilotga 261 million so‘m jarima belgilangan.
Izoh (0)