Олий Мажлис Қонунчилик палатасининг 9 август куни бўлиб ўтган навбатдаги мажлисида «Ўзбекистон Республикасининг Маъмурий жавобгарлик тўғрисидаги кодексига ўзгартишлар киритиш ҳақида»ги қонун лойиҳаси қабул қилинди.
Таклиф этилаётган қонун лойиҳаси билан Маъмурий жавобгарлик тўғрисидаги кодексида назарда тутилган дарахтларни қонунга хилоф равишда кесиш, кундаков қилиш, шикастлантириш бўйича жавобгарлик масаласи мақбуллаштирилмоқда.
Яъни битта моддада мазкур ҳуқуқбузарликка нисбатан жавобгарликни белгилаш ҳуқуқни қўллаш амалиётида турли хил ноаниқликлар келтириб чиқаришини, айни бир қилмишни бир неча маъмурий ҳуқуқбузарликлар деб квалификация қилинишининг олдини олади.
Аввалроқ Тошкент шаҳри Чилонзор туманида катта дарахтларнинг илдизига шикаст етказилгани ҳақида хабар берилганди. Бош прокуратура томонидан реконструкция қилиш жараёнида дарахтларга зарар етказилгани ҳолати текширилган.
Қайд этилишича, мутахассислар томонидан Чилонзор шоҳкўчасидаги қурилиш ҳудудида мавжуд бўлган 108 та дарахт аҳволи ўрганилган. Ўрганишда 7 та эман дарахтининг томир қисми очилиши оқибатида шикаст етказилгани ҳамда дарахтлар хавф остида қолгани аниқланган.
Мазкур ҳолат юзасидан Жиноят кодексининг 198-моддаси 3-қисми (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилиб, тергов ҳаракатлари олиб борилган.
Шунингдек, Тошкент шаҳри ҳокимлиги ҳам ҳолат юзасидан муносабат билдирган. Катта дарахтлар илдизига шикаст етказган ташкилотга 261 миллион сўм жарима белгиланган.
Изоҳ (0)