Farg‘onadagi “daraxtkushlik” oqibatida tabiatga 856,5 mln so‘m zarar keltirilgani ma’lum qilindi

O‘zbekiston tumani “Qirqketmon” MFY hududida elektr tarmoqlari xodimlari tomonidan daraxtlar ruxsatsiz, noqonuniy kesilayotgan vaqtida ekoqo‘mita xodimlari tomonidan to‘xtatilib, qolgan daraxtlar saqlab qolingan. Bu haqda Rasul Kusherbayev Davlat ekologiya qo‘mitasiga tayanib xabar qilmoqda.

Qo‘mita matbuot xizmatining bildirishicha, 48 tup sosna, 9 tup shumtol va 30 tupdan ortiq mevali daraxtlar kesilishi natijasida 856 500 000 so‘m miqdorida tabiatga zarar yetkazilgan bo‘lib, to‘plangan hujjatlar chora ko‘rish uchun Farg‘ona viloyat prokuraturasiga yuborilibdi.

Avvalroq, Toshkentning Chilonzor tumanida daraxtlar qurishi va tabiatga 348,9 mln so‘mlik zarar yetishi mumkinligini inobatga olib Chilonzor tumani prokuraturasi tomonidan Jinoyat kodeksining 198-moddasi 3-qismi bilan jinoyat ishi qo‘zg‘atilgan edi.