Qashqadaryoda fuqaro singlisiga telefon qilgan mahalladoshini pichoqladi

Qashqadaryo viloyati Yakkabog‘ tumanida fuqaro pichoqlangani haqida xabar qilindi. Holat yuzasidan viloyat prokuraturasi “Daryo”ga ma’lumot berdi.

Qayd etilishicha, 8-avgust kuni Yakkabog‘ tumani, Qo‘shilish qishlog‘ida yashovchi 30 yoshli yigit mahalladoshiga “nega singlimga telefon qilasan” deb, singlisining sha’ni va qadr qimmatini kamsitishda, oilasining tinchligini buzishda ayblab, qo‘lidagi pichoq bilan mahalladoshining tanasining turli qismlariga urib, jarohat yetkaza boshlagan.

Jabrlanuvchi olgan tan jarohatlari bilan qochib qutulish uchun odamlardan baqirib yordam so‘rab, paxta dalasi bilan yonma-yon bo‘lgan tut plantatsiyasi ichiga qochib kirgan.

Jabrlanuvchining baqirib yordam so‘raganini eshitgan fuqarolar hodisa joyiga yetib kelgan. Gumondor jinoiy harakatlarini o‘ziga bog‘liq bo‘lmagan holatda oxirga yetkaza olmasdan, qo‘lidagi pichoq bilan hodisa joyidan qochib yashiringan.

Shifokorlar tomonidan jabrlanuvchiga ko‘rsatilgan tibbiy yordam tufayli uning hayoti saqlab qolingan.

Mazkur holat yuzasidan 8-avgust kuni Yakkabog‘ tumani prokuraturasi tomonidan Jinoyat kodeksining 25,97-moddasi 1-qismi bilan jinoyat ishi qo‘zg‘atildi.