Asalhoney nomi bilan tanilgan Asal Xo‘jayeva Toshkentdagi uyida o‘lik holda topilgani, holat yuzasidan jinoyat ishi qo‘zg‘atilgani haqida xabar berilgan edi. Toshkent shahar sudlarining ma’lum qilishicha, blogerni o‘ldirgan yigit 16 yil 6 oyga qamaldi.
Ma’lumot uchun, qotillikni Xorazm viloyatida tug‘ilgan K.Sh. ismli shaxs sodir etgan. Yigit 2021-yilning yoz faslida instabloger bilan tanishib, u bilan uchrashish uchun 300 dollar taklif qilgan. Yigitda bu mablag‘ yo‘qligi sabab 2022-yilning fevral oylarida yana Xo‘jayeva bilan aloqaga chiqqan. O‘sha paytda ayol yigitni haqorat qilgan. Ayblanuvchi qasd olish maqsadida uni o‘ldirib, boyliklarini qo‘lga kiritish to‘g‘risida jinoiy reja tuzgan.
U Instagram orqali Asalhoney’ning uy manzilini aniqlagan. Keyin uyga borib, eshikni taqillatgan, eshikni ochgan blogerning qorniga pichoq urgan. Bloger jasadi topilganidan 1—3 kun oldin o‘ldirilgan.
Yigit uydagi 31 million so‘mlik boyliklarini qo‘lga kiritgan. Bundan tashqari, blogerning kartasidagi 1 million so‘mni onlayn qimor o‘yinlariga tikib yuborgan. Shundan keyin tongda uyni tark etgan.
Holat bo‘yicha Jinoyat kodeksining 97 (qasddan odam o‘ldirish) va 164-moddalari (bosqinchilik) bilan ish ochilib, materiallar sudga oshirilgan.
9-avgust kuni jinoyat ishlari bo‘yicha Shayxontohur tuman sudida sudlanuvchi K. Sh. (1997-yilda Xorazm viloyatida tug‘ilgan)ga nisbatan jinoyat ishini ko‘rib chiqish bo‘yicha sud jarayoni nihoyasiga yetib, sud hukmi e’lon qilindi.
Qayd etilishicha, ushbu jinoyat ishi jinoyat ishlari bo‘yicha Shayxontohur tuman sudi raisi T.Obidov raisligida ko‘rib chiqildi.
E’lon qilingan sud hukmiga ko‘ra, K. Sh. Jinoyat kodeksining 97-moddasi 2-qismi “i” bandi va 164-moddasi 3-qismi “v”, “g” bandlarida nazarda tutilgan jinoyatlarni sodir etganlikda aybli deb topilib, unga Jinoyat kodeksining 59-moddasiga asosan tayinlangan asosiy jazolarni qisman qo‘shish yo‘li bilan 16,5 yil muddatga ozodlikdan mahrum qilish jazosi tayinlandi.
Jinoyat ishi bo‘yicha “Ipak Yo‘li” OAITB Chilonzor filialida saqlanayotgan 10 269 000 so‘m jabrlanuvchining qonuniy vakiliga qaytarilishi va sudlanuvchidan qonuniy vakil foydasiga 20 849 899 so‘m qoplanmagan zarar undirilishi belgilandi.
Qonuniy vakilga yetkazilgan moddiy va ma’naviy zararni undirish yuzasidan fuqarolik tartibida sudga murojaat qilish huquqi tushuntirildi.
Hukm ustidan apellyatsiya shikoyati va protesti hukm e’lon qilingan kundan e’tiboran 20 sutka ichida, mahkum va fuqaroviy da’vogar tomonidan esa ularga hukmning ko‘chirma nusxasi topshirilgan kundan e’tiboran shu muddat ichida Toshkent shahar sudiga berilishi mumkin.
Izoh (0)