Асалҳоней номи билан танилган Асал Хўжаева Тошкентдаги уйида ўлик ҳолда топилгани, ҳолат юзасидан жиноят иши қўзғатилгани ҳақида хабар берилган эди. Тошкент шаҳар судларининг маълум қилишича, блогерни ўлдирган йигит 16 йил 6 ойга қамалди.
Маълумот учун, қотилликни Хоразм вилоятида туғилган К.Ш. исмли шахс содир этган. Йигит 2021 йилнинг ёз фаслида инстаблогер билан танишиб, у билан учрашиш учун 300 доллар таклиф қилган. Йигитда бу маблағ йўқлиги сабаб 2022 йилнинг февраль ойларида яна Хўжаева билан алоқага чиққан. Ўша пайтда аёл йигитни ҳақорат қилган. Айбланувчи қасд олиш мақсадида уни ўлдириб, бойликларини қўлга киритиш тўғрисида жиноий режа тузган.
У Instagram орқали Асалҳонейънинг уй манзилини аниқлаган. Кейин уйга бориб, эшикни тақиллатган, эшикни очган блогернинг қорнига пичоқ урган. Блогер жасади топилганидан 1—3 кун олдин ўлдирилган.
Йигит уйдаги 31 миллион сўмлик бойликларини қўлга киритган. Бундан ташқари, блогернинг картасидаги 1 миллион сўмни онлайн қимор ўйинларига тикиб юборган. Шундан кейин тонгда уйни тарк этган.
Ҳолат бўйича Жиноят кодексининг 97 (қасддан одам ўлдириш) ва 164-моддалари (босқинчилик) билан иш очилиб, материаллар судга оширилган.
9 август куни жиноят ишлари бўйича Шайхонтоҳур туман судида судланувчи К. Ш. (1997 йилда Хоразм вилоятида туғилган)га нисбатан жиноят ишини кўриб чиқиш бўйича суд жараёни ниҳоясига етиб, суд ҳукми эълон қилинди.
Қайд этилишича, ушбу жиноят иши жиноят ишлари бўйича Шайхонтоҳур туман суди раиси Т.Обидов раислигида кўриб чиқилди.
Эълон қилинган суд ҳукмига кўра, К. Ш. Жиноят кодексининг 97-моддаси 2-қисми «и» банди ва 164-моддаси 3-қисми «в», «г» бандларида назарда тутилган жиноятларни содир этганликда айбли деб топилиб, унга Жиноят кодексининг 59-моддасига асосан тайинланган асосий жазоларни қисман қўшиш йўли билан 16,5 йил муддатга озодликдан маҳрум қилиш жазоси тайинланди.
Жиноят иши бўйича «Ипак Йўли» ОАITБ Чилонзор филиалида сақланаётган 10 269 000 сўм жабрланувчининг қонуний вакилига қайтарилиши ва судланувчидан қонуний вакил фойдасига 20 849 899 сўм қопланмаган зарар ундирилиши белгиланди.
Қонуний вакилга етказилган моддий ва маънавий зарарни ундириш юзасидан фуқаролик тартибида судга мурожаат қилиш ҳуқуқи тушунтирилди.
Ҳукм устидан апелляция шикояти ва протести ҳукм эълон қилинган кундан эътиборан 20 сутка ичида, маҳкум ва фуқаровий даъвогар томонидан эса уларга ҳукмнинг кўчирма нусхаси топширилган кундан эътиборан шу муддат ичида Тошкент шаҳар судига берилиши мумкин.
Изоҳ (0)