Xalq ta’lim vaziri o‘rinbosari Temur Komilov 8 avgust kuni AOKAda bo‘lib o‘tgan matbuot anjumanida Andijon XTB boshlig‘i hibsga olinishi yuzasidan izoh berdi. Bu haqda “Daryo” muxbiri xabar bermoqda.
2022 yilning 7-iyun kuni Andijon viloyat xalq ta’limi boshqarmasi boshlig‘i Azizbek Mirkomilov Andijon shahri hokimi Bahrom Haydarovning qamoqqa olinishiga sabab bo‘lgan jinoiy ish — budjetning 48 milliard so‘mini talon-toroj qilishda gumondor sifatida hibsga olingandi.
Bosh prokuratura tomonidan olib borilayotgan tergov ishi doirasida 37 nafar shaxsga nisbatan ayblov e’lon qilgan. Ayni kunga qadar yetkazilgan zararning 23 foizi qoplangan.
Xalq ta’lim vaziri o‘rinbosari Temur Komilovning aytiishicha, 2020-yildan boshlab Xalq ta’lim vazirligi korrupsiyaga qarshi kurash maqsadida ichki auditini kuchaytirib, tegishli organlar bilan birgalikda ishlagan.
“Andijonda 2020-yilning boshida 5,9 milliard so‘m aniqlanib, prokuraturaga berilgandi. O‘sha yilning noyabr oyida 25 milliard so‘mlik o‘g‘irlikni rasman e’lon qilgandik. Bu materiallar huquq tartibot organlariga berilganidan keyin nazorat taftishdan o‘tkaziladi va tegishli moliyaviy organlar qayta taftish qiladi. 33,8 milliard so‘mlik ish sudga oshirilgan”, — deydi u.
Temur Komilovning aytishichcha, shundan so‘ng ham Andijonda bu kabi holatlar to‘xtamagani ma’lum bo‘lgan.
“Vazirlikning o‘zi 2021-yilning sentabr oyiga kelib, masofaviy tahlil asosida o‘zlashtirish alomati borligini aniqladi. Bunga o‘zimizning kuchimiz yetmadi, ‘bank siri‘ degan narsa bor. Biz Hisob palatasiga murojaat qildik, Ular bilan birgalikda tekshiruv o‘tkazildi, unda yana 11 milliard so‘mdan ziyod plastik kartoka orqali o‘g‘irlik aniqlandi. Bu ish ham huquq tartibot organlariga taqdim etildi. Ular o‘zlariga berilgan vakolat doirasida tergov ishlarini amalga oshirishdi. Tergovda davlat moliyaviy nazorat organlari bilan birgalikda bevosita vazirlikning ichki audit vakillari ham ishtirok etdi. Tergov ishlari hozirgi kunda yakunlanib, uyushgan jinoyatchilik bo‘yicha sudga oshirilgan, sud organlari belgilangan tartibda jarayon yakunlach e’lon qilishadi”, — deydi xalq ta’lim vaziri o‘rinbosari.
Mutasaddining qo‘shimcha qilishicha, amalga oshirilgan o‘g‘rilikni ochishga, shu holatni tizimdan yo‘q qilib tashlashga vazirlikning o‘zi tashabbus ko‘rsatgan.
Izoh (0)