Yevropa Chempionlar Ligasi guruh bahslarida ofsaydni aniqlash uchun yangi tizimdan foydalaniladi

UEFA Chempionlar Ligasida o‘yindan tashqari holatni aniqlash uchun yarimavtomat tizimdan foydalanish boshlanganini e’lon qildi.

Texnologiya Chempionlar Ligasining guruh bosqichidayoq amalga kiritiladi. U har bir futbolchining tanasidagi 29 ta nuqtani kuzatish imkoniga ega bo‘lgan maxsus kameralar orqali ishlaydi.

ESPN ma’lumotlariga ko‘ra, videoyordamchi hakamning qaror qabul qilish vaqtini o‘rtacha 70 soniyadan 25 soniyagacha qisqartiradi. Tomoshabinlar esa stadionda ofsayd holatining uch o‘lchamli modeli ko‘rish imkoniyatiga ega bo‘ladi.

“UEFA doimiy ravishda o‘yinni yaxshilash va hakamlar ishini qo‘llab-quvvatlash uchun yangi texnologik yechimlarni izlaydi. Ushbu innovatsion tizim VAR jamoalariga o‘yindan tashqari holat yuz bergani yoki yo‘qligini tezroq aniqlash imkonini beradi va shu orqali o‘yin sur’ati hamda qarorlar izchilligini oshiradi.

Tizim rasmiy o‘yinlarda foydalanish uchun tayyor va Chempionlar Ligasi o‘tkaziladigan har bir stadionda joriy qilingan”, — deydi UEFA hakamlar qo‘mitasi rahbari Roberto Rozetti.

Avvalroq “Real” va “Ayntraxt” o‘rtasidagi UEFA Superkubogida ilk bor ofsaydni aniqlaydigan yarimavtomat tizimdan foydalanilishi xabar qilingandi.