УЕФА Чемпионлар Лигасида ўйиндан ташқари ҳолатни аниқлаш учун яримавтомат тизимдан фойдаланиш бошланганини эълон қилди.
Технология Чемпионлар Лигасининг гуруҳ босқичидаёқ амалга киритилади. У ҳар бир футболчининг танасидаги 29 та нуқтани кузатиш имконига эга бўлган махсус камералар орқали ишлайди.
ESPN маълумотларига кўра, видеоёрдамчи ҳакамнинг қарор қабул қилиш вақтини ўртача 70 сониядан 25 сониягача қисқартиради. Томошабинлар эса стадионда офсайд ҳолатининг уч ўлчамли модели кўриш имкониятига эга бўлади.
«УЕФА доимий равишда ўйинни яхшилаш ва ҳакамлар ишини қўллаб-қувватлаш учун янги технологик ечимларни излайди. Ушбу инновацион тизим VAR жамоаларига ўйиндан ташқари ҳолат юз бергани ёки йўқлигини тезроқ аниқлаш имконини беради ва шу орқали ўйин суръати ҳамда қарорлар изчиллигини оширади.
Тизим расмий ўйинларда фойдаланиш учун тайёр ва Чемпионлар Лигаси ўтказиладиган ҳар бир стадионда жорий қилинган», — дейди УЕФА ҳакамлар қўмитаси раҳбари Роберто Розетти.
Аввалроқ «Реал» ва «Айнтрахт» ўртасидаги УЕФА Суперкубогида илк бор офсайдни аниқлайдиган яримавтомат тизимдан фойдаланилиши хабар қилинганди.
Изоҳ (0)